Tulo ka mag-uuma ang gipatay ug pami-pamilya ang biktima sa lain-laing kaso sa kabangis sa armadong mga elemento sa rehimeng US-Duterte sa milabayng duha ka semana.

Sa Sorsogon, gipusil patay ang magtiayon nga silang Silvestre Fortades, Jr., 70, ug Rose Marie Galias, 68, sa gidudahang mga elemento sa militar sa Barangay San Vicente, Barcelona, niadtong Enero 15. Mga myembro sa Anakpawis Partylist ug Samahan ng mga Magsasaka sa Sorsogon ang magtiayon.

Ayha niini, giaresto ug gipriso niadtong Disyembre 9, 2021 sa Barangay Sta. Lourdes sa parehong lungsod ang panday nga si Vicente Laguidao human giakusahang myembro siya sa Bagong Hukbong Bayan (BHB).

Napatay usab sa pagpamusil sa mga elemento sa 62nd IB si Arnold Suerte sa Sityo Manlibod, Barangay Sandayao, Guihulngan City niadtong usang Enero 15. Samaron ug gipriso ang duha pa ka sibilyan nga silang James, France, ug usa pa ka menor de edad. Gitortyur ug giaresto usab ang residenteng si Ritchie Sabeleo. Human ang krimen, gibalita sa militar nga napatay sa engkwentro si Suerte.

Sa wala pa ang insidente, giatake ug iligal nga giutingkay sa parehong yunit sa militar ang unum ka balay sa kasikbit nga Sityo Natoling, Barangay Budlasan, Canlaon City. Tibuok kaadlawon nga gihadlok sa mga sundalo ang managparyente nga Corson ug Montefalcon, lakip ang pipila ka bata, usa ka adunay kabilinggan ug usa ka walo ka bulang mabdos.

Gitaho usab sa BHB-Negros niadtong Enero 16 ang susamang kaso sa pagpangransak sa Sityo Tuko Gamay, Barangay Trinidad sa Guihulngan City, ug paturagas nga pagpamusil sa Sityo Mamballo, Barangay Quintin Remo, Moises Padilla sa Negros Occidental.

Sa Bacolod City niadtong Enero 6, gidagit sa gidudahang mga elemento sa estado si Joyna Lacio Sabanal sa Fortune Towne, Barangay Estefania. Ang biktima mao ang asawa sa bilanggong pulitikal nga si Roger Sabanal.

Samtang sa Tabuk City, Kalinga, gidakop sa duha ka pulis ang lider-mag-uuma nga si Domingo Sebastian niadtong Enero 10 sa alas-8 sa gabii sa Barangay Bulo. Si Sebastian usa ka mamumuong-panguma nga myembro sa Danggayan dagiti Mannalon ti Isabela.

Sa kalambigit nga balita, gibasura niadtong Enero 3 sa korte sa Bayombong, Nueva Vizcaya ang gama-gamang kaso batok sa mga aktibista ug mag-uumang silang Francis Esponilla, Romar Busania ug Michael Gatchalian. Arbitraryong giaresto sa usa ka tsekpoynt ang tulo niadtong Mayo 2015 sa Diadi sa parehong prubinsya. Mga myembro sila sa Timpuyog Dagiti Mannalon iti Quirino ug Bayan Muna Partylist.