Magkasunod nga mga opensiba ang gilunsad sa Bagong Hukbong Bayan (BHB)-Far South Mindanao sa South Cotabato isip pagdepensa sa katawhang T’boli nga biktima sa kabangis sa Armed Forces of the Philippines (AFP).

Giambus sa mga Pulang manggugubat ang nag-operasyong yunit sa 38th IB sa Barangay Tudok, T’boli niadtong Disyembre 31, 2021. Sa pasiunang taho, dili moubos sa pito ka sundalo ang napatay ug tulo ang nasamdan.

Sa misunod nga adlaw, gipabuthan sa BHB ang usa ka kolum sa 11th Special Forces Battalion (SFB) sa bukirung bahin sa parehong barangay. Lima ka sundalo ang napatay ug duha ang nasamdan.

Gideploy ang mga yunit sa BHB human maghulog og 12 ka bomba niadtong Disyembre 30, 2021 sa kaadlawon ang militar sa Sityo Busong-Apang. Mibugsok ang mga bomba sa mga umahan sa Lumad T’boli nga pipila ka metro lamang ang gilay-on sa sentro sa baryo. Gitugaw niini ang kahilum sa komunidad ug nagbunga og kahadlok sa mga sibilyan. Human niini, nagdeploy ang AFP og mga sundalo gikan sa 38th IB ug 11th SFB aron mang-utingkay sa maong lugar.

Kasamtangang nagpadayon ang nakapokus nga operasyong militar sa mga barangay sa utlanan sa Kiamba, Sarangani ug T’boli, South Cotabato. Kini nga mga lugar langkub sa mga konsesyon sa 88 Kiamba Mining Development Corporation, Inc. ug Kiamba Mining Corporation.