Iti umay a Disyembre 26, rambakan ti Partido Komunista ng Pilipinas ti maika-55 anibersaryo ti pannaka-itakder na. Maysa iti kangatuan a rebbengen ti Partido itatta ket ti panagpatibker iti bukod iti ideolohiya, pulitika ken organisasyon tapno naan-anay a paayen ti kampanya ti pananglapped ti kabusor, idauluan ti masa iti panaglaban iti papet, parigat ken pasista a rehimen nga US-Marcos ken iyabante ti demokratiko a rebolusyon ti umili.

Usaren tayo nga okasyon ti anibersaryo tapno pasingkedan manen ti pangngeddeng ti tunggal kadre ken kameng, kabarbaro man wenno nabayagen, nga itantudo ti Marxismo-Leninismo-Maoismo ken dagiti basaran a prinsipyo ti Partido a nakalanad iti konstitusyon ken programa na. Ingato tayo manen dagiti gemgem ken baliksen ti sapata nga aramiden ti amin a kabaelan tapno ingato ti proletaryo a rebolusyonaryo a kaammuan, ken pagserbian ken ilaban ti interes ti umili iti amin a panawen, kas ti insapata ti tunggal maysa iti panagkameng iti Partido.

Intay met rambakan iti Disyembre 16, ti rebolusyonaryo a biag ni Kadua Jose Maria Sison, daulo a nagitakder ti Partido, iti okasyon ti umuna nga anibersaryo iti ipupusay na. Nairut tayo a petpetan dagiti patawid na a sursuro iti panangiyabante ti rebolusyonaryo a pannakidangadang ti umili a Pilipino.

Intay lagipen amin dagiti martir ken bannuar ti rebolusyon a Pilipino. Kangatuan a pammadayaw kadakuada iti agtultuloy nga panagrampaya ken panagregta ti armado a pannakidangadang ken dagiti pannakidangadang a masa. Naan-anay na nga inawan kinapudno ti ibagbaga ti kabusor a marebbek ken gibusan na ti Partido, ti hukbo ken nagkaykaysa a prente.

Agraraira ti kasasaad a pabor tapno lalo a riingen, organisaen ken patignayen ti nalawa nga umili a Pilipino. Napartak a malunglungsot ti agari-ari a sistema a malakolonyal ken malapyudal iti Pilipinas. Awan-anawa daytoy a gunggunggonen ti aggidgiddan a krisis iti ekonomya ken pulitika gapu iti nalungsot, parigat, papet ken pasista a panagturay ti rehimen a Marcos.

Mangidandanon daytoy ti nakarkaro a panagsagaba iti umili a Pilipino. Kangrunaan a rebbengen ti Partido nga idauluan ti nalawa a masa iti pagilian a naregget nga agkalkalikagom a makidangadang tapno ilaban dagiti pangkabiagan ken pagimbagan da, ken salakniban dagiti demokratiko a karbengan da.

Iti tengnga ti pangkagimongan a riribuk, adda iti posisyon ti Partido nga idauluan ti panagregta dagiti pannakidangadang masa, ken palawaen ken papigsaen ti rebolusyonaryo a tignayan a masa agpada iti syudad ken kaaw-awayan, kagiddan ti sibubukel a panagpabwelo iti demokratiko a rebolusyon ti umili.

Sipipinget tayo a palawaen ken papigsaen ti Partido ken ti organisado nga intar ti masa. Ilinteg dagiti panagsiasi ken rimbawan amin dagiti kakapuyan ken panagdua-dua. Uyusen ken pagmaymaysaen ti pungtot iti barukong ti masa, ken idauluan dagiti panaglaban da aglalo iti sango ti nakaro a panangidadanes ken pananggundaway. Para kadagiti baro a rebbengen, kasapulan tayo dagiti baro a pwersa a napnuan gagar, regta ken militansya. Sukatan tayo dagiti napukaw ken timmamnay.

Naragsakan ti Partido iti sangsangkamaysa a pablaak idi Nobyembre 23 ti National Democratic Front of the Philippines (NDFP) ken ti Gobyerno ti Republika ti Pilipinas (GRP) tapno lukatan manen ti tungtungan a kappia.

Daldaliasaten tayo ti laban iti negosasyon kagiddan ti panagisayangkat iti armado a pannakidangadang tapno gun-oden ti nainkalintegan ken pangmabayagan a kappia. Kabatog daytoy ti panagitandudo ti pudno a reporma iti daga, nailian nga industriyalisasyon, nailian a wayawaya ken pudno a demokrasya.

Supiaten ti panagusar ditoy ti reaksyonaryo nga estado kas instrumento iti panangallilaw tapno iduron ti NPA nga ibbatan dagiti armas, ken ikkatan ti pigsa ti rebolusyonaryo a tignayan. Naan-anay nga ilaksid ti ubbaw a proklamasyon nga “amnestiya” ti rehimen Marcos nga inruar para iti manangallilaw a panggep a panagpasuko. Agserserbi laeng daytoy iti pangbukod nga interes dagiti sumagmamano a timmalikud ken nagtraydor iti interes ti umili. Nasken nga ilaksid, tubngaren ken ibelleng ida iti basuraan ti pakasaritaan.

Iti intero a lubong, limmatak ti kinaannatop nga agbaringkuas laban iti ganggannaet a panagsakop ken pasismo iti nakired nga armado a pannakilaban ti umili a Palestino, kasta met dagiti umili iti Myanmar ken dadduma pay a pagilian. Naimpanawenan ti inrussuat ti NDFP nga internasyunal a teoretikal a kumperensya maipanggep iti imperyalista a gubat a nagserbi nga okasyon tapno papigsaen ti panagtitinnulong ti naduma-duma a proletaryo, anti-imperyalista ken manangwayawaya a tignayan iti intero a lubong, ken papigsaen ti panangwaragawag a mangiyabante ti nainkalintegan a gubat ken armado a pannakidangadang laban iti imperyalista a gerra.

Dagiti komunista a Pilipino ket paset ti sangalubongan a proletaryo a rebolusyon laban iti imperyalismo, ti maudi a tukad ti agang-angsab a kapitalismo. Ibagbagi na ti rebolusyonaryo a manangwayawaya a tignayan ti umili a Pilipino. Daton na iti sangalubongan a tignayan nga anti-imperyalista ti panaglaban iti umir-irteng a hegemonismo ti US iti pagilian iti langa ti umad-adu a base militar ken masansan ken dadakkel a war games iti kadagaan ken baybay iti Pilipinas. Nasken a todo a labanan ti sibubukel nga umili ti panangusar ti US iti pagilian kadagiti geopolitikal a panggep na iti Asia-Pacific, ken isilpo daytoy iti sangalubongan a pannakidangadang tapno lappedan ti panaggil-ayab ti inter-imperyalista a gerra.

Iti syudad ken kaaw-awayan, agtultuloy nga agpappapigsa ti Partido ken dagiti rebolusyonaryo a pwersa. Sipipinget nga iyab-abante ti rebolusyonaryo a tignayan a masa dagiti amin a demokratiko a dasig ken sektor tapno ilaban dagiti interes da. Agtultuloy a pappapigsaen ken palpalawaen ti nagkaykaysa a prente nga antipasista, anti-imperyalista ken antipyudal tapno buklen ti kalalawaan a panagkaykaysa ti umili ken isina ti agturturay a rehimen Marcos. Pinaka-importante, agtultuloy nga agpappapigsa ti NPA iti dalan ti armado a pannakidangadang kas kangrunaan nga igam ti panaglaban.

Sitatalek ti Partido nga iti napinget a panagregget ti amin a kadre ken kameng, maidauluan na ti agtultuloy a panagpapigsa ti rebolusyonaryo a pannakidangadang iti amin a tay-ak, ken agballigi ti nailian-demokratiko a rebolusyon iti Pilipinas agturong iti sosyalista a masanguanan.