NAGKADAGHANG MGA KASO sa paglapas sa tawhanong katungod ang nataho sa mga lungsod sa Northern Samar atubangan sa walay hunong nga mga operasyong kombat sa 20th IB. Bag-o lang, nataho dinhi ang mga kaso sa pagpamomba, pagpamusil, blokeyo sa pagkaon ug panginabuhian ug sekswal nga pagpangabuso sa mga sundalo.

Sa lungsod sa Las Navas, nagpabuto og pusil ang mga hubog nga sundalo sa Barangay San Francisco niadtong Abril 9. Sa Barangay San Miguel, nagpabuto ang mga sundalo og mortar sa alas-11 sa gabii niadtong Marso 12 duul sa mga kabalayan.

Sa Catubig, gitiunan og pusil ug gimolestya sa usa ka elemento sa CAFGU, ug usa pa ka sundalo, ang usa ka 15-anyos nga batang babaye nga pauli gikan sa usa ka bayle sa Barangay Hinagonoyan niadtong Abril 12.

Samtang, padayon nga ginabawalan sa 20th IB ang mga mag-uuma sa tanang barangay nga sakop sa mga operasyong kombat niini nga magdala og bugas o unsamang pagkaon sa ilang mga umahan. Ginakontrol usab sa mga sundalo ang lihok sa mga mag-uuma ug nagpahamtang og curfew.

Sa Davao City ug Davao de Oro, gipig-ot ug pugos nga “ginapasurender” sa mga sundalo sa 10th ID ang mga lider-mamumuo sa rehiyon nga silang Carlo Olalo ug Melodina “Melod” Gumanoy. Giadtoan sila ug ilang mga pamilya niadtong Abril 23 ug 26.

Sa Negros Occidental, giaresto sa 79th IB ug mga pulis ang duha ka menor-de-edad nga mag-igsuon nga nag-edad og 16 ug 17 sa Sityo Humayan, Barangay Pinowayan, Don Salvador Benedicto niadtong Abril 25. Giparada sila sa 79th IB isip mga naarestong “batang manggugubat” sa Bagong Hukbong Bayan.

Sa Albay, nasamdan sa pagpamusil sa mga sundalo sila Ace Diano ug Francis Leteral sa Barangay del Rosario, Jovellar niadtong Abril 25. Iligal nga giaresto ug gipahapa usab sa mga berdugo ang mag-uyoan nga silang Ernesto Lumangaya ug Arlan Lumangaya, apan nakaikyas ra usab sila.