Earth Day: Protesta kontra reklamasyon. Nagtapok ang mga mangingisda, grupong maki-kinaiyahan, mga tawong-simbahan ug residente sa mga komunidad sa palibot sa Manila Bay sa usa ka porum ug protesta sa Caloocan City ug Navotas City niadtong Abril 20, isip kabahin sa pagdumdum sa Earth Day niadtong Abril 22. Ilang giduso ang hinanali nga pagpahunong sa magun-ubong Navotas Bay Reclamation Project ug uban pang reklamasyon ug dredging sa Manila Bay ug sa laing bahin sa nasud.

Ilutaw si William Lariosa. Subling gipanawagan sa Kilusang Mayo Uno-Southern Mindanao Region ug Anakbayan-Southern Mindanao sa usa ka protesta niadtong Abril 25 sa Davao City ang hinanali nga pagpalutaw sa gidagit nga organisador sa mga mamumuo nga si William Lariosa, 63. Gidagit siya sa mga ahente sa 48th IB niadtong Abril 10 sa Barangay Butong, Quezon, Bukidnon.

Piket alang sa CBA. Subling nagprotesta ang mga mamumuo sa PhilFoods Fresh Baked Product Inc sa National Conciliation and Mediation Board Region IV-A sa Calamba, Laguna niadtong Abril 24 aron kundenahon ang deadlock o pagbalibad sa kapitalista sa PhilFoods nga ibigay ang dugang suhulan ug mga benepisyong gipangayo nila sa ilang CBA.

Ika-31 nga Kalibutanong Adlaw sa Gawasnong Pagpamahayag. Naglunsad og protesta ang mga myembro sa midya ug estudyanteng midya niadtong Mayo 3 aron dumdumon ang ika-31 nga Kalibutanong Adlaw sa Gawasnong Pagpamahayag. Gilunsad nila ang protesta sa UP Diliman ug sa Boy Scout Monument sa Quezon City ug nanawagan og hustisya alang sa tanang gipatay nga midya ug biktima sa paglapas sa katungod sa gawasnong pagmatala sa nasud. Sa unang 22 ka bulan sa poder sa rehimeng Marcos, narekord sa mga grupo ang 135 ka insidente sa paglapas sa katungod sa gawasnong pagmantala.