Sa pagdumdum karong tuiga sa Kalibutanong Adlaw sa Pamuo, gipalig-on sa Revolutionary Council of Trade Unions (RCTU) ang rebolusyonaryong katungdanan niini nga palalumon ang pagtuki ug pagsusi sa kahimtang sa hut-ong mamumuo aron palagsikon ang ilang pagsukol. Ang kolektibong interes sa mga mamumuo alang sa pagpataas sa suhulan, pagpaubos sa presyo sa palaliton, maayo ug luwas nga kahimtang sa trabaho, katungod mag-unyon, seguridad sa trabaho, ug uban pang demokratikong pangayo ang unang lakang sa paghugpong sa ilang kusog.

Lig-on nga mibarog ang RCTU sa makatarunganong pagpaasdang sa nasudnong minimum nga suhulan nga katugbang sa makabuhi nga suhulan; pagbatok sa tanang porma sa pagpangdaugdaug, pagpanglimbong, ug pag-atake sa giusang pwersa sa estado ug mga kapitalista. Tahas niining abton ang pinakalapad nga ihap sa mga mamumuo, unyonisado man o dili, o bisan ang mga myembro sa mga dilawang unyon.

Sa duha ka tuig ni Marcos Jr sa poder, anaa sa abereyds nga ₱43-₱44 lamang ang usbaw sa suhulan sa tibuok nasud. Sa padayon nga pagsaka sa presyo sa mga palaliton, paspas nga mikunhod ang tinuod nga bili sa suhulan sa mamumuo. Ang kasamtangang ₱610 nga minimum nga suhulan sa National Capital Region, ₱502 lamang ang tinuod nga bili.

Pabiling nakatak-um ang baba sa rehimeng Marcos sa pagpataas sa suhulan sa mga mamumuo ngadto sa tinuod nga makabuhi nga suhulan sa kantidad nga ₱1,200 ug pagpatuman sa nasudnong minimum nga suhulan. Kung buut hunahunaon, gamay kaayo ang ₱1,200 kumpara sa dakung bahandi nga gimugna sa mga mamumuong Pilipino para sa mga kapitalista.

Pakigbisog alang sa makabuhi nga suhulan

Niadtong Mayo 1, lain-laing grupong mamumuo ilalum sa National Wage Coalition ang nagmartsa sa Metro Manila aron ipanawagan ang pagpausbaw sa inadlawng suhulan sa nasud. Gipanghingusog nila ang hinanali nga pagbalaod sa dili moubos sa ₱150 across-the-board nga dugang sa minimum nga suhulan isip pasiunang lakang sa pagkab-ot sa makabuhi nga suhulan. Gilangkuban ang koalisyon sa Trade Union Congress of the Philippines, Kilusang Mayo Uno (KMU), Bukluran ng Manggagawang Pilipino, ug Nagkaisa Labor Coalition.

Sa pangpublikong sektor, gipanawagan sa mga empleyado ang pagpataas sa sweldo ngadto sa ₱33,000 kada bulan pinaagi sa pagbalaod sa usa ka bag-ong Salary Standardization Law (SSL). Giduso usab sa mga magtutudlo nga patas-an ang sweldo sa mga bag-ong magtutudlo ngadto sa ₱50,000.

Pagka-udto, nagmartsa ang liboan ka mamumuo ug uban pang sektor sa pagpanguna sa KMU ug Bagong Alyansang Makabayan (Bayan) padulong sa US Embassy aron batukan ang kasamtangang gakahitabo nga Balikatan Exercises 39-24 tali sa mga pwersang militar sa US ug Pilipinas. Gikundena nila ang pagyatak sa imperyalistang US sa soberanya sa Pilipinas ug pag-among sa nasud sa gipagrabe niining pakigdutdut sa karibal nga imperyalistang China. Gimakmak usab nila ang ginaduso sa rehimeng Marcos, sa tukmod sa US, nga charter change (chacha).

Gisulayan pagharang sa mga pulis ang martsa, ug gibomba og tubig aron bungkagon kini. Unum ka batan-ong aktibista, nga gitawag og Mayo Uno 6, ang giaresto ug gipriso. Mokabat og ₱252,000 ang gitakdang pyansa aron sila makagawas sa prisohan.

Gidumdum usab ang Adlaw sa mga Mamumuo sa mga protesta sa Angeles City, Calamba City, sa Rosario sa Cavite, Legazpi City, Cebu City, Iloilo City, Bacolod City ug Davao City. Ayha ang protesta niadtong Mayo 1, lain-laing aktibidad usab ang gilunsad sa mga mamumuo ug empleyado.

Sa gawas sa nasud, gihimo ang mga aktibidad sa 15 ka sentro sa protesta sa US, sa Australia, Hong Kong, Japan, South Korea, ug New Zealand sa pagpanguna sa Migrante International.