Nagadamo nga isip sang mga kaso sang paglapas sa tawhanon nga kinamatarung ang nalista sa mga banwa sang Northern Samar sa atubang sang wala untat nga mga operasyon kombat sang 20th IB diri. Kasan-o lang, nalista diri ang mga kaso sang pagpamomba, pagpaniro, blokeyo sa pagkaon kag palangabuhian kag sekswal nga pagpang-abusar sang mga suldado.

Sa banwa sang Las Navas, nagpalupok sang pusil ang mga hubog nga suldado sa Barangay San Francisco sadtong Abril 9. Sa Barangay San Miguel, nagpalupok ang mga suldado sang mortar mga alas 11 sang gab-e sadtong Marso 12 malapit sa mga kabalayan.

Sa Catubig, gintayaan sang pusil kag ginmolestiya sang isa ka elemento sang CAFGU, kag isa pa ka suldado, ang isa ka 15-anyos nga batang baye nga papule halin sa isa ka baylehan sa Barangay Hinagonoyan sadtong Abril 12.

Samtang, padayon nga ginbawalan sang 20th IB ang mga mangunguma sa tanan nga barangay nga sakop sang mga operasyon kombat sini nga magdala sang bugas ukon anuman nga iban pa nga pagkaon sa ila nga mga ulumhan. Ginakontrol man sang mga suldado ang hulag sang mga mangunguma kag nagpapanaog sang curfew.

Sa Davao City kag Davao de Oro, gin-ipit kag pilit nga “ginpasurender” sang mga suldado sang 10th ID ang mga lider-mamumugon sa rehiyon nga sila ni Carlo Olalo kag Melodina “Melod” Gumanoy. Ginkadtuan sila kag ila mga pamilya sadtong Abril 23 kag 26.

Sa Negros Occidental, gin-aresto sang 79th IB kag mga pulis ang duha ka menor-de-edad nga mag-utod nga edad 16 kag 17 sa Sityo Humayan, Barangay Pinowayan, Don Salvador Benedicto sadtong Abril 25. Ginparada sila sang 79th IB isip naaresto nga “batang hangaway” sang Bagong Hukbong Bayan.

Sa Albay, napilasan sa pagpaniro sang mga suldado sila ni Ace Diano kag Francis Leteral sa Barangay del Rosario, sa Jovellar sadtong Abril 25. Iligal nga gin-aresto kag ginpahapa man sang mga berdugo ang magtiyo nga sila ni Ernesto Lumangaya kag Arlan Lumangaya, apang nakapalagyo man.