Rinibo nga estudyante ken manursuro iti sumagmamano a kangrunaan nga unibersidad iti US ti nagisayangkat ti baro a serye dagiti protesta tapno iduron dagiti administrasyon dagiti unibersidad nga iyatras ti suporta ken panagpuonan dagitoy iti Zionista nga Israel. Adu nga unibersidad ti nairut a makitintinnulong iti industriya a militar ti US, iti kasta ket addaan sungsungbatan da iti henosidyo ti Israel iti Gaza.

Iti mandar ti gubyerno a Biden, sinerrek ken naranggas a dinuprak dagiti pulis dagiti protesta kadagiti nasao nga unibersidad.

Kalatakan ti kampuhan nga intakder dagiti estudyante ken manursuro iti Columbia University iti New York idi Abril 25. Naranggas a dinuprak dagiti pulis ti kampuhan ken adu nga estudyante ti naaresto ken nakasuan.

Malaksid iti Columbia, signipikante met dagiti tignay iti 18 pay a dadakkel nga unibersidad iti nadumaduma a paset ti US manipud Abril agingga iti agdama. Nasabat met dagitoy ti nararanggas nga aksyon ti pulis, a labsing iti wayawaya nga akademiko ken nangipeggad iti biag ken pagsayaatan dagiti estudyante ken manursuro.

Nagwarasen kadagiti unibersidad iti sabali pay a paset ti lubong dagiti protesta ken kampuhan. Timmauden dagiti kapada a protesta iti uneg ti dadakkel nga unibersidad idiay Australia, France, Italy, Poland ken Britain. Kas iti US, iruprupir dagiti estudyante a putden dagiti unibersidad ti silpo iti pinansya iti Israel a makitkita da a panagsuporta iti henosidyo iti Gaza.

Iti maudi a naimaldit idi Mayo 2, saan a bumaba iti 35,000 sibilyan a Palestino ti napapatayen dagiti Zionista a puersa iti awan-ressat a panagbomba ken panang-atake daytoy iti Gaza manipud Oktubre 7, 2023. Dakkel a bilang kadagitoy ket ubbing (14,500) ken babbai (8,400).