Sinabat ti protesta dagiti demokratiko nga organisasyon ti panaglukat ti Balikatan 39-24 idi Abril 22. Iti panangiyuna ti Bagong Alyansang Makabayan (Bayan), nagprotesta da iti hedkwarters ti Armed Forces of the Philippines iti Camp Aguinaldo idiay Quezon City tapno ipasardeng ti war games ti tropa a militar ti US ken Pilipinas iti pagilian.

Idi Abril 26, nagmartsa agturong iti embahada ti US dagiti mangmangged tapno babalawen ti maar-aramid a Balikatan war games. Ti tignay ket maikatlo iti serye ti naiyuswat a Balikatan war games. Nagprotesta met asideg iti embahada ti US dagiti grupo manipud iti Southern Tagalog idi Mayo 5 ken dagiti grupo ti kababaihan idi Mayo 6.

Kabayatan na, kinundena ti Bayan-Ilocos ti panangisayangkat ti sumagmamano a paset ti Balikatan 39-24 iti rehiyon. Saan a bumaba iti 2,000 tropa a militar ti Pilipinas ken US ti simmangpet iti Ilocos para iti war games. Naituding a maisayangkat iti La Paz sand dunes iti Barangay La Paz, Laoag City, Ilocos Norte ti live-fire exercises. Naikeddeng met a pabettaken ken palneden ti puersa ti US ken Pilipinas ti BRP Lake Caliraya, maysa a barko a decommissioned, iti kabaybayan iti batog ti prubinsya. Palalo nga inapektaran ti nasao a war games ti pagbiagan iti rehiyon, nangruna dagiti mangngalap a napasardeng a tumapog.