Rinambakan ti National Democratic Front of the Philippines (NDFP) ti maika-51 anibersaryo na idi Abril 24, kadua dagiti alyado nga organisasyon ken intero a rebolusyonaryo a tignay iti Pilipinas ken ballasiw-taaw. Naiyaramid ti nadumaduma a tipo ti aktibidad tapno lagipen ti anibersaryo. Naiyuswat met idi Abril 17-Abril 24 ti lawas ti pananglagip kadagiti rebolusyonaryo a martir.

“Militante a kablaaw ti idandanon mi kadagiti alyado nga organisasyon ti NDFP, nangruna iti makidangdangadang a masa a Pilipino, a ti saan nga agkupas a sirib ken determinasyon da a gun-oden ti pudno a nailian a wayawaya ken demokrasya ket agserserbi a saan a matdukan a bubon ti rebolusyonaryo a pigsa tayo,” pablaak ni Ka Luis Jalandoni, Chief International Representative ti NDFP.

Kadagiti pablaak, indanon met dagiti alyado nga organisasyon ti NDFP ti nabara a kablaaw iti anibersaryo. Ti NDFP ket bukbuklen ti 18 nga organisasyon. Nangiyebkas met ti pannakikaykaysa ti sumagmamano kadagiti pangrehiyon a balangay ti NDFP. Kinablaawan met ti Communist Party of the Philippines ti NDFP ken kinuna daytoy nga iti sango ti awan-kapada a korapsyon, pasismo ken panagpakaaso-aso ti rehimen Marcos iti imperyalista a US, adda ti madagdagus a pagkasapulan nga ad-adda pay a papigsaen ken palawaen ti NDFP ken dagiti alyado nga organisasyon na.

Idiay Europe, nagisayangkat ti piket, nagipinta kadagiti islogan ken nagtitipon dagiti kameng ti Anti-Imperialist Action Ireland idi Abril.

Inpintor da kadagiti pader iti sumagmamano a syudad iti Ireland dagiti balikas a “VIVA CPP-NPA-NDF” ken inyukrad da dagiti bandera ti NDFP kadagiti protesta ken tignay da. Inyaramid da dagiti aktibidad ti pannakikaykaysa iti Wicklow, Dublin, Galway ken Waterford iti Ireland.

Kabayatanna, nagipaskil ti maysa a mural ti Friends of the Filipino People in Struggle (FFPS)-Vancouver iti Canada tapno rambakan ti anibersaryo ti NDFP. Nagiruar met ti maysa a baro a kanta ti FFPS para iti anibersaryo a napauluan ti “Celebrate the NDF!”