DILI MOUBOS SA 12 ka progresibo ang gikasuhan sa rehimeng Marcos og “terorismo” ug “terrorism financing” (pagpondo sa terorismo) sa milabayng duha ka semana. Kini aron pig-oton sila ug ang ilang giapilang mga organisasyon.

Sa Quezon, gipasakaan og “terrorism financing” silang Paul Tagle, tigpamaba sa Tanggol Quezon, ug Fritz Labiano, koordineytor sa Kabataan Partylist sa prubinsya. Gikasohan sila tungod sa paghatag og hinabang ug pagkaon sa mga bilanggong pulitikal niadtong Hulyo 2023.

Sa Negros Island, gipasakaan og susamang kaso ang pipila ka kanhi ug aktibong myembro sa “Paghida-et sa Kauswagan” Development Group Incorporuged (PDG Inc). Giakusahan og “terrorism financing” silang Clarissa Ramos, si Felipe Levy Gelle, Federico Salvilla, ug Perla Pavillar. Gikasuhan usab si Darryl Albañez, dili myembro sa PDG Inc apan nakigtinabangay sa grupo sa mga aktibidad niini.

Sa Leyte, arbitraryong gipa-freeze o gibalang gamiton ang kaugalingong akawnt sa bangko ni Jazmin Jerusalem ug sa gipangulohan niining Leyte Center for Development, Inc. (LCDe) niadtong Mayo 2. Gimando niadtong Abril 26 ang pag-freeze sa maong mga akawnt tungod sa kasong “terrorism financing” nga gisang-at batok kaniya ug sa usa pa ka empleyado sa LCDe.

Sa Nueva Ecija, gipasakaan usab og kasong “terorismo” o paglapas sa Anti-Terrorism Act of 2020 silang Nathanael Santiago, Anasusa San Gabriel, Rosario Brenda Gonzales, ug Servillano Luna Jr nga parehong mga aktibista ug lider masa. Gilambigit sila sa mga sundalo sa 84th IB sa engkwentro niini sa Bagong Hukbong Bayan (BHB) sa Barangay San Fernando Sur, Laur, Nueva Ecija niadtong Oktubre 8, 2023, human nga “naila” kuno sa mga sundalo. Aduna pay 30 ka pangalan nga gilambigit sa maong kaso.