Indi magnubo sa 12 ka progresibo ang ginpasakaan sang rehimen Marcos sang kaso nga “terorismo” kag “terrorism financing” (pagpondo sa terorismo) sa nagligad nga pila ka semana. Ginpasaka ang mga kaso para ipton sila kag ang ginalakipan nila nga mga organisasyon.

Sa Quezon, ginpasakaan sang “terrorism financing” sila ni Paul Tagle, tigpamaba sang Tanggol Quezon, kag Fritz Labiano, koordineytor sang Kabataan Partylist sa prubinsya. Ginpasaka ang kaso sa ila tungod sa paghatag bulig kag pagkaon sa mga bilanggong pulitikal sadtong Hulyo 2023.

Sa Negros Island, ginpasakaan sang kasubong nga kaso ang pila ka daan kag aktibo nga katapo sang “Paghida-et sa Kauswagan” Development Group Incorporated (PDG Inc). Ginpasibangdan sang “terrorism financing” sila ni Clarissa Ramos, si Felipe Levy Gelle, Federico Salvilla, kag Perla Pavillar. Ginkasuhan man si Darryl Albañez, indi katapo sang PDG Inc pero nagapakigbinuligay sa grupo sa mga aktibidad sini.

Sa Leyte, arbitraryo nga ginpa-freeze ukon ginbawalan nga tandugon ang kaugalingon nga akawnt sa bangko ni Jazmin Jerusalem kag sang ginapamunuan sini nga Leyte Center for Development, Inc. (LCDe) sadtong Mayo 2. Ginsugo sadtong Abril 26 ang pag-freeze sa nasambit nga mga akawnt tuga sang kaso nga “terrorism financing” nga ginpasaka batuk sa iya kag isa pa ka empleyado sang LCDe.

Sa Nueva Ecija, ginpasakaan man sang kaso nga “terorismo” ukon paglapas sa Anti-Terrorism Act of 2020 sila ni Nathanael Santiago, Anasusa San Gabriel, Rosario Brenda Gonzales, kag Servillano Luna, Jr nga pareho mga aktibista kag lider masa. Ginadalahig sila sang mga suldado sang 84th IB sa engkwentro sini sa Bagong Hukbong Bayan (BHB) sa Barangay San Fernando Sur, Laur, Nueva Ecija sadtong Oktobre 8, 2023, matapos kuno “makilal-an” sang mga suldado. May 30 pa nga pangalan nga gindalahig sa nasambit nga kaso.