Idi Marso, binisita ni Gilbert Teodoro Jr, kalihim iti depensa, ti maysa a base a nabal idiay Casiguran, Aurora. Daytoy a base ket binangon ti AFP iti pannakitinnulong ti Aurora Pacific Economic Zone and Freeport Authority (APECO) tapno kontraen kano ti kaadda ti China idiay Benham Rise. Sakbay na, simrek iti katulagan ti APECO iti Philippine Aerospace Development Corporation (PADC) tapno baliwan ti engklabo kas “defense hub” (sentro a pangdepepensa) ti pagilian. Panggep daytoy a panagtipon ti panangibangon ti sona a pang-industriyal-militar iti uneg ti 12,923-ektarya nga engklabo ti pagubraan.

Kinuna ni Teodoro, ti panangbaliw ti APECO ket maitunos iti Comprehensive Archipelagic Defense Concept (CADC) ti AFP, a maipasurot iti kabuklan nga estratehiya ti US iti Asia Pacific. Mausar kano ti APECO para iti Self-Reliant Defense Posture Program a nakapauneg iti modernisasyon ti AFP. Agbalin daytoy a sentro ti mentinasyon ken panangtarimaan kadagiti lugan a pangtangatang ti militar. Inpasindayag na met nga agbalin daytoy a sentro ti panagaramid kadagiti drone.

Rinibo a mannalon, mangngalap ken katutubo nga Aeta idiay Casiguran ti naagawan ti daga ken napapanaw kadagiti komunidad da idi damo a naipasdek ti APECO. Ti panangbaliw kadaytoy agturong iti base ken engklabo nga industriyal-militar ket lalo a mangpakaro iti represyon ken pananggamrod ti daga ti masa a mannalon ken katutubo idiay probinsya.

Pammutbuteng iti umili ken aktwal nga us-usaren ti AFP dagiti moderno a ramit na na iti panagbomba, panagkanyon ken awan aniaman a panagpaltog iti komunidad ti mannalon. Itay laeng nabiit, binomba na dagiti komunidad idiay Dipaculao ken Maria Aurora. Usar dagiti drone, pinairteng na ti mangsipot iti aktibidad ti masa ken intero a sibilyan a populasyon.