Sadtong Marso, ginbisita ni Gilbert Teodoro Jr, tiglikom sang depensa, ang isa ka baseng nabal sa Casiguran, Aurora. Ang base nga ini ang gintukod sang AFP sa pakigbinuligay sang Aurora Pacific Economic Zone and Freeport Authority (APECO) para kontrahon kuno ang presensya sang China sa Benham Rise. Bag-o sini, nagsulod sa kasugtanan ang APECO sa Philippine Aerospace Developmenet Corporation (PADC) para itransporma ang engklabo isip “defense hub” (sentro pangdepensa) sang pungsod. Katuyuan sang pagtingob nga ini ang pagtukod sang sona nga pang-industriyal-militar sa sulod sang 12,923-ektarya nga engklabo sang pamugon.

Hambal ni Teodoro, ang transpormasyon sang APECO ang sandig sa Comprehensive Archipelagic Defense Concept (CADC) sang AFP, nga nabalay sa pangkabilugan nga estratehiya sang US sa Asia Pacific. Pagagamiton kuno ang APECO para sa Self-Reliant Defense Posture Program nga nakapaidalom sa modernisasyon sang AFP. Mangin sentro ini sang pagmantine kag pagkay-o sang mga salakyan pangkahawaan sang militar. Ginapadayaw man sini nga mangin sentro ini sang pagmanupaktura sang mga drone.

Linibo ka mga mangunguma, mangingisda kag tumandok nga Aeta sa Casiguran ang gin-agawan sang duta kag ginpalayas sa ila mga komunidad sang una nga ginhan-ay ang APECO. Ang transpormasyon sini padulong sa base kag engklabo nga industriyal-militar ang ilabi magapalala sa pagpanumpo kag pagpanghugakom sang duta sang masang mangunguma kag tumandok sa prubinsya.

Ginapamahog kag aktwal nga ginagamit sang AFP sa pumuluyo ang mga moderno nga kagamitan sini sa pagpamomba, pagpanganyon kag patarasak nga pagpaniro sa komunidad sang mangunguma. Kasan-o lang, ginbomba sini ang mga komunidad sa Dipaculao kag Maria Aurora. Gamit ang mga drone, ginpasingki sini ang pagpanilag sa aktibidad sang masa kag bug-os nga populasyon sang sibilyan.