Nakalawlawag a saan a gayyem ti umili a Pilipino ti imperyalismo nga US. Awan panagduadua a pinaneknekan ti panangpuntirya ti militar ti US kadagiti Pilipino iti naipalgak a limed a kampanya a disimpormasyon na idi kapigsa iti pandemya a Covid-19. Nangisit a gandat idi ti US a sabidongan ti panunot dagiti Pilipino iti kamali nga impormasyon kanaig iti bakuna a Sinovac manipud China, a pinaruar na a saan daytoy a natalged wenno epektibo, tapno paboran dagiti bakuna nga aramid-US kas iti Pfizer ken Moderna. Dayta a panangipasaknap ti US iti disimpormasyon ket nangted la unay iti peggad iti pampubliko a salun-at iti Pilipinas, ken patien a makagapu nu apay a nagbalin a nabuntog idi ti panagbakuna iti pagilian.

Ti nasao a kampanya a disimpormasyon ket indauloan ken pinondoan ti Pentagon wenno Department of Defense ti US. Nangrugi dayta iti sidong ti sigud a gobyerno a Trump, ken nagtultuloy inggana kadagiti umuna a bulan iti agdama a gobyerno a Biden. Dakkel a pondo ti inbukbok ti US para iti panangipakat kadagiti soldado ken dadduma pay a tao-an da tapno agparnuay ken mangmanehar kadagiti ginasut a peke nga account iti social media tapno impluwensyaan dagiti Pilipino iti islogan a “China ti virus.”

Iti daytoy a kampanya a disimpormasyon ket inrussuat ti militar iti US segun iti linya nga “aktibo a kombat” nga isu’t doktrina a pagrarairaen ita ti US iti kompetisyon ken pannakiriri kadagiti imperyalista a karibal na a China ken Russia. Us-usaren ti US dagiti pwersa militar na iti “aktibo a kombat” uray awan iti mapaspasamak a direkta nga armado a risiris. Ar-aramiden na daytoy kagiddan dagiti panglipit nga addang iti ekonomya (kas kadagiti sangsyon wenno pananglipit iti panagpuonan ken linnakoan), uray pay iti aktibo a panagusar iti pwersa militar tapno kontraen ti lumawlawa a pigsa ken impluwensya dagiti karibal na.

Iti kastoy a kampanya a disimpormasyon wenno gerra iti impormasyon ket agtultuloy ita nga ar-aramiden ti imperyalista US ditoy Pilipinas. Puntirya na ti panunot dagiti Pilipino tapno paruaren a “gayyem, kabinnulig ken alyado” da ti US, ken “kabusor” ti China. Kakumplot dagiti aso-aso na iti gobyerno a Marcos, uray ti dadduma a senador ken kongresista, dagiti mabaybayadan wenno maim-impluwensyaan nga institusyon, ken taon-an iti burges a masmidya, dinamili ti US panunot dagiti Pilipino tapno ipaawat kadakuada ti presensya ken panagari dagiti soldado nga Amerikano iti uneg ken lawlaw iti pagilian.

Paspasingkedan manen ti killo a pammati a “big brother” wenno “manong” ti US a “mangisalakan” iti “kakaasi” a Pilipino, kasupadi ti kinapudno a duan a daras a ginerra ti imperyalismo US ti Pilipinas tapno agawen ti nagun-od a wayawaya iti rebolusyonaryo a pannakilaban dagiti Pilipino, umuna laban iti kolonyalismo nga Espanya, ken maikadua, laban iti panangsakop iti Japan. Parparuaren ita babaen iti Mutual Defense Treaty, a “tulungan” ti US ti Pilipinas laban iti China, idinto a ti kinapudno ket saan nga aggunay ti US nu saan na nga unaen ti bukod na nga interes. Us-usaren ti US dagiti katulagan militar na iti Pilipinas tapno maaramat ti pagilian kas dakkel a base na tapno irussuat na ti probokatibo a gerra laban iti China.

Rubrubruban ita ti US ken rehimen a Marcos ti Sinophobia wenno ti isterya, dudua, buteng wenno pungtot iti China ken amin a Chinese iti Pilipinas. Uray awan ti kongkreto nga ebidensya, ipaspasaknap ti US dagiti patta-patta kanaig kadagiti espiya a Chinese, impiltrasyon ken dagiti sikreto a grupo dagiti soldado a Chinese ditoy Pilipinas. Ni Marcos mismo ti numero uno a promotor iti namin-ano a daras a panangipangngeg maysa a “pangruar a pangta” ti China iti Pilipinas, gapu kano kadagiti risiris iti kabaybayan. Bayat nga aglublubid ti istorya iti “plano ti China a panagraut,” agari-ari dagiti pwersa militar ti US ken siwayawaya nga us-usaren na ti daga, tangatang ken taaw ti Pilipinas kadagiti panagsanay ken panagsagana iti gerra.

Kakumplot ti US, agulit-ulit ti AFP ken Philippine Coast Guard iti pananggandat a mangitugot kadagiti ramit pangkonstruksyon kadagiti “supply mission” daytoy idiay Ayungin Shoal, nga ammo da a mangprobokar iti China gapu ta labsing daytoy kadagiti sigud a katulagan na iti Pilipinas. Igaggagara a laplapdan ti US ken rehimen Marcos ti dalan iti dayalogo wenno negosasyon nga isu’t rumbeng a dana tapno natalinaay a risuten ti risiris iti taaw. Iti awan-ressat a panangprobokar ti rehimen US-Marcos, ti China ket agresibo ken nasabrak iti pannakilangen na iti Pilipinas ken iti saan na a panangbigbig kadagiti karbengan ti Pilipinas a binigbig ti sangalubongan nga ukom idi 2016.

Awan-ressat, awan-uma ken awan-pannakaibus ti pondo nga ibukbukbok ti imperyalismo a US iti amin a tay-ak ti gerra iti impormasyon, tapno imula ti ugali nga adipen ken ugali a traydor kadagiti Pilipino. Inaldaw a mangmangngeg ti timek ti imperyalismo a US nga agsasao iti nadumaduma a langa ken katatao iti social media, kadagiti damag, iti mismo ngiwat ni Marcos ken kadagiti opisyal iti gobyerno na.

Dakes a panggep ti imperyalismo a US a punasen kadagiti Pilipino ti amin a rikna iti nabara a panagayat iti pagilian, ken ipaaklon iti umili nga isuda ket naragsak a balud iti sidong iti malakolonyal a turay na iti Pilipinas. Kayat na nga ipaaklon iti umili ti ar-aramiden na a panangipayat iti panagwaywayas ti Pilipinas ken panagusar na iti pagilian kas instrumento iti panangdurog ti US iti armado a risiris iti China. Kayat na nga ikidem dagiti Pilipino ti mata da iti nalawag a kinapudno a ti pagilian ita ket instrumento iti heyopolitikal nga estratehiya ti US, nga addaan panggep nga ipataw ti solo a panagari na iti naduma-duma a suli iti lubong ken palidpidan ti siasinnoman a pagilian wenno pwersa a mangsupiat.

Rumbeng a napinget a bantayan, ibutaktak ken ilaksid iti umili a Pilipino ti gerra a disimpormasyon ti imperyalismo a US ken aso-aso a rehimen Marcos tapno kontrolen wenno impluwensyaan ti panunot, sikolohiya ken emosyon da. Awan sabali a mas epektibo a wagas nu saan a ti panangirusuat ti tignay a panagadal tapno sublian ti pakasaritaan, saan nga iti burges a punto de bista ken maka-US, nu di ket iti pannirigan ti masa a lumablaban, tapno riingen ken parubruben ti makabayan a pakinakem ti umili, iti panagdaliasat da iti dana iti pannakidangadang para iti pudno a wayawaya ti pagilian.