Buong-siglang ipinagdiwang ng rebolusyonaryong organisasyon ng mga guro, kababaihan at migranteng Pilipino ang ika-56 anibersaryo ng Partido Komunista ng Pilipinas (PKP) noong Disyembre 26. Sa magkakahiwalay na pahayag, nagbigay-pugay ang tatlong alyadong organisasyon ng National Democratic Front of the Philippines (NDFP) sa maningning at puno ng determinasyong pamumuno ng Partido sa rebolusyong Pilipino.

“Mula sa hanay ng natatanging rebolusyonaryong organisasyon ng mga kababaihan sa Pilipinas, pagpupugay ang ipinapaabot namin sa lahat ng mga namumuno at sa buong kasapian ng PKP,” ayon sa Makabayang Kilusan ng Bagong Kababaihan (Makibaka). Ibinahagi ng grupo na “hindi maitatatwa…ang magkasalikop na mga prinsipyo, adhikain at mga tungkulin [ng PKP at Makibaka] para sa pagpapalaya ng mga kababaihan, lalo na ng mga kababaihang anakpawis mula sa uring magsasaka at manggagawa.”

Anito, pinatutunayan ng kasaysayan ng dalawang organisasyon na dapat integral na pinagsasanib ang usapin pangkababaihan at kilusang kababaihan, gayundin ang iba pang usapin ng kasarian, sa maka-uring kilusan at kilusan ng buong mamamayan. “Magpapatuloy ang Makibaka na manindigan at tatanaw na may lenteng siyentipiko at maka-uri sa mga usaping pangkababaihan at pangkasarian para labanan at gapiin ang anumang porma ng repormiso, sektoralismo, radikalismo, ang ano pa mang panlilinlang at pag-atake ng imperyalismo sampu ng mga galamay nito sa ekonomya, pulitika at maging sa kultura,” pahayag ng grupo.

Sa pahayag nito, pinarangalan ng Katipunan ng mga Gurong Makabayan (Kaguma) ang mga martir ng Partido at rebolusyong Pilipino. “Buong pusong nagpapasalamat din ang Kaguma sa pundasyong inilatag ng pangulong tagapagtatag ng Komite Sentral ng PKP na si Prof. Jose Maria Sison sa tamang paglalapat ng Marxismo-Leninismo-Maoismo sa kongkretong kalagayan ng lipunang Pilipino,” anito.

Si Kasamang Joma ay pumanaw dalawang taon na ang nakararaan ngunit ayon sa Kaguma ay “bitbit ng bawat komunista at mga rebolusyonarong Pilipino ang mga dakilang aral na naisulat [niya], pinag-aralan at isinapraktika ng bawat rebolusyonaryo sa pang-araw-araw na paggampan at pagsulong ng mga gawain.”

Liban dito, idiniin ng Kaguma na sa harap ng tuminding krisis sa pulitika at ekonomya sa bansa ay “wala nang iba pang paraan para wakasan ang siklo ng mga pasakit at paghihirap ng mga guro at buong mamamayan kundi ang direktang paglahok at sa minimum ay ang aktibong pagsuporta sa armadong pakikibaka para maipagtagumpay ang demokratikong rebolusyong bayan.”

Pinagtibay naman ng Compatriots ang pagtalima nito sa kilusang pagwawasto na ipinanawagan ng Komite Sentral noong nakaraang taon. “Lahat ng mga balangay ng Compatriots ay handang tumalima sa kampanya sa ideolohiya na ito, at sa lahat ng rebolusyonaryong mga tungkuling inilatag para sa atin ng Partido para mapangibabawan ang lahat ng kasalukuyang mga kahinaan at abutin ang higit pang mga tagumpay,” ayon sa grupo.

Dagdag pa ng grupo, sa ilalim ng pamumuno ng PKP ay mayroong maningning na tanglaw ang kanilang pakikibaka gaanuman sila kalayo sa inang bayan. “Tinatahi nito ang ating pakikibaka sa pakikibaka ng sambayanang Pilipino para sa pambansang soberanya, tunay na demokrasya, at para sa isang bansa na maaari nating balikan at makasama ang ating pamilya,” ayon sa Compatriots.

Sa pahayag ng Komite Sentral ng Partido noong Disyembre 26, ipinahayag ng pamunuan na “tuluy-tuloy ang mga pagsisikap na muling itatag ang mga lihim na rebolusyonaryong organisasyong kaalyado ng NDFP” sa nagdaang taon. Anito, nagmula ang mga hakbang na ito sa halos ganap na pagpapabaya sa pagbubuo ng lihim na kilusang rebolusyonaryo bunga ng pagkakamali sa ligalismo at repormismo.

Anang Komite Sentral, “may mga plano at target para sa rekrutment, pagtatayo ng mga bagong balangay, pagtataguyod at pagsuporta sa rebolusyonaryong armadong pakikibaka sa kanayunan. May mga pagsisikap na pasiglahin ang pagpapatala na maging Pulang mandirigma o upisyal sa pulitika ng Bagong Hukbong Bayan.” Sa kabila nito, ibinahagi ng pamunuan na marami pang dapat gawin upang tugunan ang kagyat na pangangailangan para sa mga bagong rekrut, laluna mula sa mga kabataang manggagawa at intelektwal.