Ginadayaw sang Leonardo Panaligan Command-New People’s Army (LPC-NPA) ang yunit sang NPA sa madinalag-on nga pagharas sa Sandayao 62nd IBPA Patrol Base nga nahamtang sa Barangay Sandayao proper, Guihulngan City, Negros Oriental alas 8:00 sang gab-i, Disyembre 13, 2023.

Duha ang pilason sa pasistang 62nd IB samtang matawhay naman nga naka-atras ang NPA sa pihak sang lapnagon nga operasyon militar sa larangang gerilya.

Ini ang kongkreto nga sabat sang NPA sa mga reklamo sang pumuluyo sa kaumahan sang Central Negros bunga sang madata nga kalakasan sang 62nd IB sa pagbayolar sang tawhanon nga Kinamatarung kaangay sang pagpamahug, illegal nga pagpangransak sang mga kabalayan, pagpangkuha kag pagpangawat sang personal nga mga kagamitan lakip na ang mga kwarta, pagpangkastigo kag pagpamatay sang mga inosenteng sibilyan kag mangunguma kaangay sa brutal nga pagtiro-patay kay Braulio Tubalado sang Sityo Karanawan, Barangay Amontay, Binalbagan, Negros Occidental sadtong Disyembre 6 sang kaagahon.

Mabaskog man nga ginakondenar sang LPC-NPA ang desperado nga paglusob sang platun nga tropa sang 62nd IB sa mga panimalay sang mga mangunguma kag pilit nga pagkuha sang mga litrato sa mga natungdan sa sulod sang paninalay sa Sityo Patag, Barangay Riverside, Isabela, Negros Occidental sadtong Disyembre 11, isa ka adlaw matapos ang pagkomemorar sang Pangkalibutanon nga Adlaw sang Tawhanon nga Kinamatarung sadtong Disyembre 10, 2023. Nagtuga ini sang grabe nga kahadlok sa mga residente lakip na ang minor de edad nga mga kabataan.

Ginapanawagan ang tanan nga yunit sang LPC-NPA nga maglunsar sang malapnagon nga taktikal nga opensiba sa sakop sang larangang gerilya. Silotan ang mga traidor sa masa kag rebolusyon. Pabayaron sang dako ang mga pasistang militar ilabe na ang berdugo kag perwisyo sa masa nga mga katapo sang 62nd IB.###