Mabaskog nga nagapanindugan ang Leonardo Panaligan Command-New People’s Army nga ang mga pahayag ni MGen. Escanillas sang 3rd ID ang lunsay kabutigan.

Gusto hinabunan ni Escanillas ang kalutusan sang 62nd IB sa yunit sang LPC-NPA nga naglunsar sang madinalag-on nga kontra-opensiba batok sa pasistang tropa sang 62nd IB sadtong Hulyo 1, 2026 alas 1:30 sang hapon sa sityo Balingos, Barangay Hinakpan, Guihulngan City, Negros Oriental. Surpresa nga ginpalukpan sang NPA ang nagapahuway nga 7 ka elemento sang nasambit nga tropa nga gintunaan sang gilayon nga kamatayon sang isa kag pagkasamad sang 3 pa nga iban. Samtang padayon nga nagapalupok ang NPA nagdinalagan ang iban nga katapo sang 62nd IB nga nagbiya sa ila mga kaupdanan.

Tuyo man hinabunan ni Escanillas ang palpak nga plano nga dugmukon ang NPA nga nakakampo sa nasambit nga lugar paagi sa pagreyd nga malayo pa sa posisyon nagpinalupok na ang pasistang tropa nga gintunaan sang kakugmat sang pumuluyo sa lugar kag naka-alarma sa NPA nga gilayon hilway nga naka-atras.

Ginatolerar man ni Escanillas ang padayon nga paglapas sa CARHRIHL kag laye sa gyera sang militar batok sa mga inosenteng sibilyan paagi sa paghostage sa mga residente sadtong Hulyo 1 nga hitabo sa nasambit nga lugar. Ginpunggan ang mga mangunguma nga maggwa sa ila mga panimalay sa pagpanindahan kag pag trabaho sa ila mga uma samtang puguso sila nga gina-interogar kaangot sa presensya sang NPA.

Kabutigan man ang pahayag sang 62nd IB nga may 3 ka NPA (1 Ka babaye kag 2 ka lalaki) nga nagsurender sa otoridad dala ang tatlo ka armas (2 HPR kag isa ka malip-ot nga armas) sadtong nagligad nga Hulyo 18 sang hapon.

Wala sang NPA nga nagsurender ina nga panahon kag wala man sang armas ang NPA nga nadula. Intak ang pwersa kag armas sang NPA sa pagkakarun kag hilway nga naga tungod sang hilikuton masa sa sakop sang Larangan gerilya. Ang armas kag 3 ka individual nga ginpalapta sa social media lunsay mga “recycled.”

Ini nga mga kabutigan kag mga pagpatalang sang militar ilabe na ni Escanillas ang daan na nga tatak sang Armed Forces of the Philippines kag wala man kinalain nga gawi ni Escanillas sang siya pa ang commanding Officer sang 302nd IBde sang nagligad nga mga tinuig sa isla sang Negros. Kaangay nga gina-into sini ang ila kaugalingon kag ang pumuluyong Negrosanon paagi sa ila linubid nga mga kabutigan.

Ginapanawagan sang LPC sa pumuluyo sa Central Negros nga mag mangin mabinantayon sa mga patalang kag kabutigan sang militar. Maisog nga ibuyagyag ang pasismo sang estado kag lig-on nga manindugan para sa tawhanon nga kinamatarung, kamatuoran kag hustisya sosyal.