Read in: English

Ginasaluduhan sa New People’s Army – North Central Mindanao Region (NPA-NCMR) ang mga Pulang manggugubat sa Bukidnon sa ilang malampusong mga opensiba batok sa mga pwersa sa berdugong AFP nga nagapahigayon og focused military operation (FMO) sa rehiyon. Sulod lamang sa kapin usa ka semana, Enero 20 hangtud Enero 31, nalunsad sa NPA-Bukidnon ang walo ka hugna nga pag-atake kung asa dili moubos sa 20 ang kaswalti sa AFP.

Kaniadtong Enero 20, alas-12 sa udto, magkadungan nga giatake sa NPA ang detatsment sa AFP sa Sityo Kipulot, Brgy. Palacapao ug Brgy. Butong, Quezon, Bukidnon. Pagka-ugma, nihawa ang nagpondo nga kaaway sa Brgy, Butong ug nibalhin kini sa Davco. Usa ang kumpirmadong patay sa Brgy. Butong samtang wala pa nakuha ang tibuok detalye sa Brgy. Palacapao.

• Enero 25, alas-9:30 sa hapon, giparalisa sa NPA ang unom ka ekwipo sa Ulticon Builders Incorporated (UBI) sa Brgy. Mandahikan, Cabanglasan, Bukidnon. Lakip sa naparalisa ang duha ka backhoe, duha ka mixer, usa ka kumong-kumong ug usa ka gamay nga mixer. Ilado ang maong kumpanya sa grabeng pagpahimulos sa mga mamumuo ug katawhan pinaagi sa pagpahamtang og ubos nga suhulan, dili paghatag og 13th month pay sa mga mamumuo ug dili paghatag og damyos sa mga umahan, kabalayan ug kayutaan sa mga mag-uuma nga naapektuhan sa paghimo og mga dalan.

• Enero 26, ala-una sa kadlawon, gi-komando sa mga kauban ang kampo sa AFP sa Brgy. Minungan, Quezon, Bukidnon. Dihang nakadikit na sila sa koral, gibuhian gilayon ang usa ka handstoke ngadto sa nakaabli nga pwertahan. Nipayong na dayon og pabuto ang mga kauban nga nakaposisyon sa ibabaw nga bahin sa detachment. Nakumpirma nga tulo ang patay sa kaaway.

• Enero 27, alas-12 sa kadlawon, giatake sa NPA ang mga tropa sa 60th IB nga naggwardya sa mga ekwipo sa UBI sa Sityo Butay Simong, Brgy. Namnam, San Fernando, Bukidnon. Duha ang patay sa AFP.

• Enero 29, alas-12:30 sa udto, giatake sa NPA ang mga tropa sa AFP nga nagpahigayon sa ilang psychological operation nga community service program sa Sityo Buko, Brgy. Banlag, Valencia City, Bukidnon. Mokabat lang sa kapin 50 metros ang gilay-on sa nahimutangan sa kasundaluhan gikan sa baryo ug tataw nga gihimong taming sa sundalo ang mga sibilyan. Rifle grenade ang nagsilbing signal fire ayha gisundan sa sunud-sunod nga buto. Human niini, ni-widrow gilayon ang mga kauban apan nagbuntag nga naghuramintado ang kaaway ug nag-sige og pabuto sa ilang pusil. Wala pa nakuha ang detalye sa resulta sa maong aksyon.

• Enero 30, usa ang napatay sa kaaway sa dihang gi-isnayp sa kauban ang mga tropa sa AFP nga nagpondo sa bukirong bahin sa Sityo Saluringan, Brgy. Canangaan, Cabanglasan.

• Enero 31, alas-11 sa buntag, gipabusikaran og command detonated explosive device (CDX) ang mga tropa sa kaaway nga nag-clearing sa buntod nga giposisyunan sa isnayper sa kauban niadtong milabay’ng adlaw. Nakumpirmang lima ang patay samtang laing walo ang samaron sa kaaway. Nasayran nga dugay na nga nagpondo ug nagkampo ang maong mga tropa sa AFP sa Sityo Saluringan ug nagkalot kini aron manguha og bulawan.

Pagka-alas-dos sa hapon, paturagas ug pinataka na dayong namomba ang Agusta Westland helicopter sa lugar sa nahitaboan. Tulo ka raket ang gibuhian niini samtang laing upat ka bala sa kanyon usab ang gipabuto.

Aron paduguon sa daghang samad ang rehimeng US-Duterte, nagtinguha ang NPA-NCMR nga ilunsad sa Pulang mga kumander ug manggugubat niini ang mas daghan pa’ng opensibang aksyon. Sa kasamtangang ginaatubang nga krisis sa panglawas, ekonomiya ug pulitika sa nasud, makatarunganon lamang nga silutan ang tirano, pasista ug kurakot nga rehimen ug mga alipures niini sa ilang krimen ug pagpanglapas sa katungod ug interes sa katawhan ug pakyason ang kontra-katawhan ug hugaw nga gubat ni Duterte.