Lima nga pasista nga tropa san 20th Infantry Battalion an napatay ngan damo nga iba pa an nasamaran sa aktibo nga pagdepensa san usa kayunit san Bagong Hukbong Bayan-Rodante Urtal Command sa Barangay Catotoogan, Las Navas, Northern Samar sadton Hunyo 4, alas-2:37 san kulop.

Naghihimo san clearing operation an mga pasista nga tropa san una nga makapagpabuto an mga alertado nga Pula nga mangaraway. Kataliwan san lima kaminuto san dirudiretso pagpapabuto layon nga inatras an mga kasama. Padayon pa nga nagpabuto an mga pasista kutob sa nakaabot sira sa giniknan nga pusisyon san BHB, nga diri sira maaram nga lima kaminuto na ngay-an nga wara didto an ginpapabuthan nira.

Masa mismo an nagpaabot sa BHB hiunong sa damo nga kaswalti san 20th IB. Pagkagab-i san aragway dirudiretso an pag-agi san mga ambulansya sa kasapit nga kalsada. Nagpalupad liwat san helikopter an militar para sa ira mga kaswalti.

Naringgal gud an 20th IB sa ira kaperdihan. Kun sadto gindeklara nira nga nabungkag na an prente gerilya san BHB sa Northern Samar, yana ginpapasamwak nira sa masa nga tulo kuno kaplatun san BHB an inatake sa ira. Sira mismo an naglilinata sa masa nga “damo pa an NPA.” An tinuod nalamangan sira san maupay nga taktika nga gerilya ngan superyor nga kahibaruan sa tereyn san BHB.

Diri ungod nga mayda nakuha nga armas o mayda kaswalti an BHB. Gintanum la han mga tropa ni Lt. Col. Richard Villaflor an riple nga M-16, army pouch ngan mga magasin nga sering san 20th IB nakumpiska tikang sa mga kasama. Usa na liwat ini nga desperado nga pitad para tahuban an ira kaperdihan.

Kutob yana padayon an pasista nga panlasurbo san 20th IB sa mga baryo sa Las Navas ngan kutob sa Catubig. Padayon an pagpapasurender ngan panharas nira sa mga inosente nga parag-uma. Sa Barangay Imelda nga kasapit san Catotoogan, hul-os nga natindog an kampo militar nga menos 500 metros an distansya tikang sa baryo, sukwahi sa ginsesering san internasyunal nga makatawo nga balaud.

An madinaugon nga pagdepensa sa kalugaringon san Rodante Urtal Command pamatuod san pagpupursige san BHB sa dalan san gerra san katawhan. Sa butnga san aringasa ngan kasamok san pulitika sa nasud ngan hulga san imperyalista nga gerra, an aningal san mga bala san BHB nahatag paglaum sa katawhan nga aada an rebolusyunaryo nga hukbo nga maghahawan san dalan ngadto sa tinuod nga katalwasan, demokrasya ngan kamurayawan.