Madinalag-on nga kontra-opensiba ang ginhimo nga taktika sang Leonardo Panaligan Command-New People’s Army batok sa nagahara-hara nga tropa sang 62nd IB upod sa mga CAFGU sang Brgy Villegas Patrol Base, Brgy Villegas, Guihulngan City. Natabo ang engkwentro sa Sityo Elijan Gamay sakop sang Brgy Planas, Guihulngan City sadtong Oktubre 29. Una nga nakapalupok ang yunit sang NPA. Mga 30 minutos ang baylohanay sang lupok nga nagsugod alas 3:00 tubtob alas 3:30 sang hapon. Lima (5) ang KIA sa nasambit nga tropa militar. Bangud sini ginapunggan ang pumuluyo nga magsulod sa nahitabuan matapos ang linukpanay tubtob subong nga adlaw Oktubre 31. Ginapunggan man sang militar ang pagpauli sang mga residente sa kaugalingon nga panimalay.

Alas 9:00 sang gab-i sa amo gihapon nga adlaw natabo naman ang 7 ka minutos nga engkwentro sa tunga sang NPA kag tropa sang 62nd IB sa suba sang sityo Elijan, Brgy Buenavista, Guihulngan. Nagresulta ini sang pagka-martir ni Ka Reymund (Michael Asuncion).

Oktubre 30 alas 4:00 sang hapon madinalag-on man nga gin-snipe sang yunit sang NPA ang Brgy Budlasan Army Detachment, Canlaon City. Isa (1) ang KIA sa nasambit nga tropa suno pa sa mga pumuluyo sa lugar.

Mabaskog man nga ginakondenar sang LPC-NPA ang pagpinalupok sang berdugong 62nd IB kag pag-strafing sang nasambit nga tropa sa puluy-an sang pamilya Aliyacyac sa sityo Pangi, Brgy Magsaysay, Guihulngan sadtong Oktubre 30, 2022 alas 10:00 sang aga. Nakugmat ang nasambit nga pamilya kag iban pa nga mga kaingod sini. Lubos man ginakondenar sang Leonardo Panaligan Command -New People’s Army ang ginhimo sang militar kag kapulisan sa pagpugong sa pumuluyo sa pagsulod kag paggwa sa Brgy Planas, Villegas, Buenavista, Magsaysay kag iban pa nga kasikbit nga baryo bangud sang ginhimo nga check-points sang AFP kag PNP. Apektado ang pagpangita sang pagkaon kag pagtrabaho sang mga residente.

Ginapanawagan sa tanan nga yunit sang NPA idalum sa Leonardo Panaligan Command nga maglunsar sang lapnagon nga taktikal nga opensiba batok sa pasistang tropa sang US-Marcos II nga rehimen.

Pula nga pagsaludo kay Ka Reymund!

Mabuhay ang masa!

Mabuhay ang inaway banwa!