Matapos ang engkwentro sadtong Mayo 1, sa tunga sang isa ka yunit sang Leonardo Panaligan Command -New People’s Army (LPC-NPA) kag sa pasistang 62nd IB kag pagkapaslaw sang ila hot pursuit nga operasyon, liwat naman nila ginhimo ang ila taktika nga ang mga sibilyan ang balikan agud lang makasiling nga nangin mabungahon ang ila bilog operasyon kag may ma-propaganda sa publiko agud makakuha sang simpatiya.

Sa sulod sang isa ka bulan, natala ang serye sang mga bayolasyon sa tawhanong kinamatarung nga gikomiter sa berdugong 62nd IB sa pagpamuno sang ila Commander nga si Lt. Col. Evelio Ilangga III.

Ginpasibangdan ang mga pumuluyo nga nagasuporta sang NPA. Sadtong Mayo 15, ginpagwaan sang warrant of arrest ang mag-utod nga sila Bibiano, 40 anyos kag Helaria Gemodo, 38 anyos, sa Sityo Agpapataw, Barangay Binobohan, Guihulngan City, Negros Oriental sa pato-pato nga kasong Anti-Terror Law.

Sa amo gihapon nga petsa, ginpaidalom man sang pasistang 62nd IB sa interogasyon sila Alan Garde kag Rocky Fat sa Sityo Kapudlusan, Barangay Sandayao, sa maong syudad. Gintayaan man sang armas si Fat kag gintinguhaan nga arestuhon sa nasambit nga militar apang napunggan ini sang iya mga himata.

Antes naghalin ang militar sa lugar, ginbawalan ang mga biktima nga magreport sa barangay kag police kay kon magreport ini pasakaan sila sang mga pato-pato nga mga kaso.

Samtang sadtong Hunyo 8, ginpaidalum sa imbestigasyon sang 62nd IB upod sa surrenderee nga si Boging Campos, ang pamilya ni Tasyo Magallano sa Sityo Libas, Barangay Imelda, Guihulngan City. Ginkasahan man sang armas ang iya bata nga si Tata Magallano, 23 anyos.

Pamilyar na ang mga pumuluyo sa sini nga iskema sang militar. Ginahimo sang mga bayaran nga militar ang pagpang-redtag sa mga sibilyan, pagpasaka sang mga pato-pato nga kaso, abdaksyon, tortyur, pagpamatay kag iban pa nga mga kalapasan.

Indi matuod nga may kinatuhay ang mga militar sang panahon sang laye militar (Martial law) ni Marcos Sr kag sa subong. Mas nagalala pa ini sa sini nga panahon. Parehas lang ang mga ini nga wala respeto sang mga kinamatarung sang pumuluyo. Imbes nga sundon nila ang ila mandato nga serbisyuhan ang pumuluyo, nagpaka-ido-ido sila sang mga agalon-may-duta, komprador burgesya kag mga burukrata kapitalista. Ang ila kaalam kon may ara man, kag ang ila kusog, nasayang lang sa pagprotektar sa interes sang mga manggaranon.

Ang pasismo nga nagaluntad sa kabukiran, amo mismo ang nagatudlo sa masang mangunguma nga maghimakas kag manindugan para sa ila tawhanon nga kinamatarung.

Ang kadunot sa mala-pyudal kag mala-kolonyal nga sosyedad amo man ang magahatag sang reyalisasyon sang masang Negrosanon nga paagi lamang sa armadong paghimakas malab-ot lang ang handum nga matuod nga reporma sa duta, pungsodnon nga industriyalisasyon kag hustisya sosyal.