Mabaskog nga ginakondenar sang Leonardo Panaligan Command-New People’s Army (LPC-NPA) ang pakana sang 16 ka tropa sang berdugong 62nd IB nga nagpakuno-kuno nga mga katapo sang NPA agud mangilkil kag mangayo sang pagkaon sa mga pobre nga mangunguma sa mga sityo sang Amumuyong, Kambairan kag Banderahan tanan sang Barangay Trinidad, Guihulngan City, Negros Oriental sadtong Pebrero 26-27. Pilit nga ginpangsaka-saka ang mga kabalayan sa tion sang kagab-ihon tubtob kaagahon kadungan sa pag-imbestigar sa mga kababainhan kon diin na ang ila mga bana kag kabataan nga lalaki. Nagtuga ini sang kahadlok sa mga magagmay nga kabataan upod sa ila mga iloy sang puluy-an sa nasambit nga lugar.

Suno pa sa panayasat sang LPC-NPA, sa Sityo Mang-angkaw, Barangay Sikatuna, Isabela, Negros Occidental halos duha man ka adlaw nga ginapangsaka-saka ang mga kabalayan sang mga inosenteng mangunguma kag pilit nga ginateniran sang pasistang 62nd IB ang ila mga panimalay sadtong Pebrero 24-25, sa pihak sang ila pagpamalabag.

Samtang sa mga barangay sang Yubo kag Araal, La Carlota City, Negros Occidental, pilit nga ginapatawag ang mga pumuluyo nga magtambong sa mga pulong-pulong nga ginalunsar sang manugpatalang nga mga katapo sang 62nd IB. Ini ang nagaperwisyo sa mga mangunguma sa pagpangita sang ila palangabuhian kag pagpanguma.

Subong man sa La Castellana, Negros Occidental, masobra na sa duha ka semana nga ginatublag sang berdugong 62nd IB ang kalinong nga katulugon sang mga mangunguma sa mga sityo sang Mercedes, Tres Elis, Gomez, barangay proper tanan sang Barangay Sag-ang; mga sityo sang Kandalaba kag Taytay-bato sakop sang Barangay Cabacungan; mga sityo sang Mandayao Dos, Mandayao Tres, kag Montinola sang Barangay Mansalanao, kag mga sityo sang Mandayao Kwatro, Ilongga kag barangay proper sang Barangay Kamandag kag Sityo Polonia sang Barangay Manghanoy.

Sa pihak nga bahin, may mga check-point nga ginmuntar ang pasistang militar sa Crossing Cambagting, Crossing Asay kag Sityo Paktay sakop tanan sang Brgy Cabacungan, La Castellana, Negros Occidental gikan pa sadtong Pebrero 23, 2024. Tubtob karun padayon pa ang nasambit nga check-point nga nagadisturbo sa normal nga paghulag sang mga pumuluyo sang La Castellana kag kasikbit nga mga banwa kag syudad kaangay sang Canlaon sa Negros Oriental kag mga sakop sang Negros Occidental pareho sang Magallon, Isabela, Pontevedra, La Carlota kag iban pa.

Makahuluya nga pasulit-sulit ang deklarasyon sang Armed Forces of the Philippines (AFP) sa isla nga “dismantol” na ang lima ka mga larangan gerilya apang wala-untat ang pagdeploy sang binatalyon nga pwersa militar sa mga kaumhan sang Negros diin padayon sila nga nagabayolar sang tawhanon nga kinamatarung batok sa pumuluyo bunga sang masingki nga militarisasyon.

Nagakahulugan nga paslaw kag desperado ang AFP, PNP kag NTF-Elcac sa ginalunsar sini nga kontra-insurhensiya sa isla idalum sa US-Marcos Jr kasugpon sadto sa kampanya militar sang US-Duterte nga rehimen. Maathag nga wala sang basehan ang pagpaidalom sa Negros sa SIPS (Stable Internal Peace and Security) nga ginarekomendar sang 3ID-Philippine Army paagi kay M/Gen. Marion Sison.