Lima ka adlaw nga nagsabwag sa kahadlok ug kakuyaw ang mga tropa militar sa mga residente sa Sityo Gusa, Barangay Budlasan, Canlaon City, Negros Oriental sugod niadtong Nobyembre 27. Sulod sa maong mga adlaw, duha ka pagpanglapas sa tawhanong katungod ang narekord sa yunit sa Leonardo Panaligan Command-New People’s Army (LPC-NPA).

Giransak sa mga pasistang tropa ang panimalay ni Joan Lechan, usa ka yanong residente sa maong lugar. Sama sa mga miaging insidente, gipasanginlan si Lechan nga dugay na nga nagahatag og suporta sa mga NPA.

Dugang niini, giransak usab ang balay sa pamilyang Perolino. Gi-interogar ug gihadlok si Gary ug Billy Perolino samtang si Jastine Perolino, minyo, ug adunay duha ka bata nga 5 anyos ug 2 anyos, gipailalom sa interogasyon kabahin sa bana niya nga dugay na nga giinitan sa 62nd IB tungod sa aktibong pagpanalipod niini sa tawhanong katungod sa mga residente sa ilang komunidad. Adunay higayon nga gihulga si Jastine sa mga pasista nga kung dili siya mutug-an kung asa ang iyang bana, i-masaker sa tropa sa 62nd IB ang tibuok niyang pamilya lakip na ang duha ka menor de edad nga mga bata.

Kini nga mga taktika dili na bag-o sa mga lumulupyo sa kabanikanhan. Busa, kinahanglan ipakita sa mga lumulupyo ang ila panaghiusa pinaagi sa pagpalanog sa panawagan nga iundang na ang militarisasyon sa lugar ug manindugan para sa ila katungod aron mahunong ang mga maong mga panghitabo.

Makigbisog, ayaw kahadlok!