Enero 21 sang hapon—60 ka tropa sang berdugong 62nd IB ang sakay sa rio trak ang ginbubo sa Sityo Sambag, Barangay Manghanoy, La Castellana, Negros Occidental.

Enero 22—nahisayran sang pumuluyo nga nagapanglakaton, nagapanaka-saka sa mga kabalayan padulong sa Barangay Kamandag proper.

Samtang may 30 man ka pasistang tropa sang 62nd IB halin sa Sityo Sigsag, Barangay Sag-ang. Nag-agi sa Sityo Tulo-tulo padulong sa Sityo Texas sakop sang Barangay Kamandag tanan sang La Castellana.

Sa pihak nga bahin, may 30 man ka berdugong tropa sang amo gihapon nga yunit militar ang nagatiner sa Sityo Gomez sang Barangay Sag-ang nga nagapugong sa gwa-sulod sang mga pumuluyo sa nasambit nga lugar. Ginapunggan sang militar ang paggwa sang mga residente sa ila mga minoro matapos nga ginbakwit ang mga ini kag wala ginpabalik sa ila lugar sa sulod sang tatlo ka adlaw (Enero 17-20) matapos sang peke nga engkwentro. Halos indi na makakadto ang mga residente sa ila trabahoan kag mga kaumahan. Nagaperwisyo ini sa hilway nga paghulag kag pagsinalayo sang mga residente sang nasambit nga lugar.

Samtang 100 man ka berdugong 62nd IB ang nagatiner sa mataas nga bahin sang Barangay Sag-ang proper. Pilit nga gin-implementar sang militar ang curfew sa lugar samtang nagapanaka-saka ang nasambit nga tropa militar sa mga kabalayan sang mga mangunguma.

Subong nga adlaw Enero 24, may apat ka tawo nga mga nakasibilyan, may dala sang mga matag-as nga kalibre sang armas nga nasulod sa mga sako, diin nagapangsaka-saka sa mga kabalayan sa Sityo Tulu-tulo, Barangay Kamandag, La Castellana sini lang nga aga, Enero 24. Ginpatihan nga mga katapo sang 62nd IB ang mga armado.

Nagtuga sang kakugmat sa pumuluyo ang presensya militar sa mga barangay sang Sag-ang kag Kamandag matapos nga gintiro-patay sang 62nd IB sanday Dionesio “Boy” Baloy kag Bernard Torres nga lunsay mga mangunguma kag sibilyan.

#62ndIBerdugo!
#AFPerwisyo!
#layasPasistangMilitar!