Samtang nagahiwat ang mga mangunguma sang simple nga Paskwa kag Bag-ong Tuig sa pihak sang grabe nga kapigaduhon kag kawad-on sa pagpangabuhi, padayon nga ginaperwisyo sang pasistang 62nd IB ang ila mga komunidad.

Ginlusob sang militar ang mga komunidad sang mga mangunguma sa Barangay Macagahay, Moises Padilla, Negros Occidental kag Barangay Trinidad, Guihulngan City, Negros Oriental sumugod sadtong Disyembre 31, 2025 tubtob sadtong Enero 5, 2026.

Ginpakat sang desperadong 62nd IB ang halos 100 ka tropa sa anum ka kolum sa mga sityo sang Banderahan, Amomoyong, Columbia kag Kambairan tanan sang Barangay Trinidad. Samtang may ara man sang tropa militar nga nahamtang sa mga sityo sang Tagbak kag Arum, sakop sang Barangay Macagahay.

Wala kaluoy nga ginapangsaka-saka ang mga kabalayan kag ginapahug ang mga residente nga mga suporter sang NPA. Samtang nagakampo ang mga militar sa ila mga balay, ginapilit sila nga pasag-ubon sang tubig para imnon kag ipaligo sang wala huya nga berdugo militar.

Wala man sang batasan nga nagapagwa sang pornographic videos atubang sang mga kabataan kag mga pamatan-on. Dugang pa ang pagpanghalit sa mga pananom kaangay sa pagpanglapak sang mga kamaisan,utanon kag iban pa nga mga tanom sang mangunguma sa lugar.

Kinahanglan ang lig-on nga paghiusa sang mga pumuluyo sa kaumhan sang Central Negros nga ibuyagyag ang ginadulot nga perwisyo sang pasistang 62nd IB sa kabuhi kag palangabuhian sang mga residente. Tingob nga magreklamo sa otoridad sa baryo, banwa kag syudad kaangot sa kabastusan nga ginapalapnag sang militar sa mga pamatan-on lakip na ang mga kabataan.