Patay ang 1 ka katapo sang 62nd IBPA suno sa mga residente sang gin-snipe sang Leonardo Panaligan Command-New People’s Army ang nakakampo nga pasistang tropa malapit sa mga puluy-an sang mangunguma sa Sityo Tuko Gamay, Brgy. Trinidad, Guihulngan City. Hungod naman nga gintago sang militar ang ila kaswalti. Ang madinalag-on nga sniping operation sang NPA natigayon Septyembre 11, 2022 alas 7:00 sang gab-e.

Ang 62nd IBPA ang masami nagatiner sa mga puluy-an sang mga mangunguma, mga eskwelahan kag simbahan sa Guihulngan sa tion sang ila mga operasyon. Ginahimo nga “human shields” sang nerbyuso nga 62nd IBPA ang pumuluyo batok sa pagpang-atake sang New People’s Army.

Nadumduman nga Agosto 30, 2022 ginharas sang NPA ang Advance Coy sang 62nd IBPA sa sityo Casingan, Trinidad diin 2 KIA kag 1 WIA sa nasambit nga tropa. Samtang Septyembre 9, 2022 naman ginsnipe sang NPA ang Guihulngan-PNP substation sa sityo Parkingan, Brgy. Trinidad, Guihulngan City, Negros Oriental. Resulta, 1 KIA sa PNP-Guihulngan samtang nagdinalagan naman ang iban pa nga kapulisan suno pa sa mga residente.

Ang asud-asod nga taktikal nga opensiba sang NPA sa Guihulngan, ang kongkreto nga sabat sang pulang hangaway sang banwa nga ara ang huiugot nga suporta sang pumuluyo. Madugay na nga ginareklamo sang pumuluyo sa kaumahan sang Guihulngan ang padayon nga bayolasyon sang nasambit nga tropa sa CARHRIHL. Nagperwisyo sa pangabuhian kag kabuhi sang mangungumang Guihulnganon ang presensya sang AFP, PNP kag NTF-Elcac sa lugar.

Wala sang proteksyon kag kaseguruhan ang Guihulnganon kag pumuluyo sa Central Negros sa “whole of the nation approach” sang reaksyonaryong estado. Taliwas ini sa ginataghol ni Maj. Gen. Benedict Arevalo sang 3ID kag B/Gen. Inosencio Pasaporte sang 303rd BdePA. Sa baylo, muklat ang pasistang militar sang ila mga bayolasyon sa tawhanon nga kinamatarung kag paglubid sang ila mga kabutigan agud hinabunan ang ila kalapasan kag kapalpakan.

Ginamanduan ang tanan nga yunit sang LPC-NPA sa paglunsar sang lapnagon kag madinalag-on nga taktikal nga opensiba upod sa paghiusa kag wala-untat nga suporta sang pumuluyo. Pabayaron ang pasistang AFP, PNP kag NTF-Elcac sa ila mga kahalitan kag pagperwisyo sa pumuluyo!