Habang ang prinsipyo ng eleksyon ay balido at progresibo dahil binibigyan nito ng karapatan ang nakararami na bumoto ng kanilang magiging lider, pinasisinungalingan ng sistema at praktika ng eleksyon sa kasalukuyang lipunan ang demokratikong katangian nito. Ang eleksyon ay nagiging kasangkapan ng naghaharing uri upang gawing lehitimo ang kanilang kapangyarihan at kontrol sa burukrasya, hindi upang isulong ang interes ng mamamayan, kundi upang pangalagaan ang kanilang ari-arian at palawakin ang impluwensya at oportunidad sa pagpapayaman.

Ang eleksyon sa isang naaagnas na malapyudal at malakolonyal na lipunan ay tagisan ng mga dinastiyang pulitikal at kinatawan ng mga panginoong maylupa, malalaking negosyo at dayuhang entidad. Sa lawak ng makinarya ng mga reaksyunaryong partido, sa limpak na salapi ng mga burukrata kapitalistang papet ng imperyalismo, sa lakas ng suporta ng mga mersenaryong AFP/PNP at kanilang mga private army sa mga dinastiyang pamilya, at ang pagkupot nila sa COMELEC, NAMFREL, pagbabayad sa mga huwad na survey firms, pag-arkila sa mga nagmamarunong na mga bayarang social media influencers, pandaraya at manipulasyon ng resulta ng botohan, ang ano mang eleksyon sa kasalukuyan nating lipunan ay tiyak na magluluklok lamang sa mga reaksyunaryong pulitiko at kanilang mga kamag-anak.

Sa gitna ng hirap na kalagayan ng mamamayan sanhi ng malalang sakit ng sistemang panlipunan – kawalan ng disenteng hanapbuhay, kapos sa panustos sa saligang pangangailangan sa pang-araw-araw dahil sa mataas na presyo ng bilihin at serbisyo – marami sa kanila kumakapit sa ilusyon ng eleksyon bilang kanilang pag-asa sa kaginhawaan. Marami ang nalilinlang sa pagsuporta sa mga dinastiyang pulitikal at tirano na kadalasan ay kabahagi o kinatawan ng naghaharing uri, kapalit ng kaunting ginhawa hatid ng kakarampot na salapi at sistemang padrino.

Hindi magagamot ng eleksyon ang malalang sakit ng lipunang Pilipino at kailanman ay hindi maipagtatagumpay sa reaksyunaryong eleksyon ang pambansang demokrasya. Kaya ang panawagan ng Kaguma ay ang ganap na pagwasak sa malapyudal at malakolonyal na lipunan. Sa pamamagitan ng demokratikong rebolusyon lamang matutuldukan ang imperyalismo, pyudalismo, at burukrata kapitalismo, kalakip ang pangingibabaw ng naghararing uri sa sistemang pampulitika na nagpapanatili dito.

Bagamat pag-uumpugan ng mga pangkat ng naghaharing uri ang reaksyunaryong eleksyon, ito ay isang larangan ng pakikibaka ng mga progresibo at patriyotikong pwersa, partido at mga kandidato na kumakatawan sa uring anakpawis, at iba pang uri at sektor ng aping mamamayan at tumatangan sa kanilang mga hinaing. Sila ay naglalayong palakasin ang boses ng ordinaryong tao sa loob ng burukrasyang sibil, magtulak na tugunan ang mga suliranin at usapin na may malaking epekto sa buhay ng ordinaryong mamamayan, magpatupad ng mga makabuluhang inisyatiba at reporma upang bawasan ang tumitinding paghihikahos ng nakararami dulot ng krisis, lalo na ang nasa laylayan, habang hindi nababago ang kasalukuyang panlipunang kaayusan. Mahalaga rin ang kanilang pagsisiwalat ng kabulukan ng tradisyunal na reaksyunaryong pulitika, pang-aabuso sa kapangyarihan at mga katiwalian sa burukrasyang sibil.

Ang mga ligal na samahan ng mga guro kasama ang mga hayag na patriyotikong sektor ng ating lipunan ay maaaring lumangoy sa pakikibakang elektoral at makilahok sa parlyamentaryong tunggalian ng mga konserbatibo at progresibong pwersa sa ating lipunan. Ang paglahok ng mga progresibong guro sa eleksyon ay pagkakataon upang malawakan at maramihang maorganisa ang masang guro at aktibong mapakilos sa mga kampanya at militanteng pakikibaka lagpas pa sa usaping elektoral. Mainam na buuin ang lakas ng masang guro at pagkakaisa nito sa iba pang uri at sektor lalo na sa masang anakpawis upang maigiit ang mga karapatan ng mamamayan, maitaguyod ang makabayan, siyentipiko, at makamasang edukasyon, isulong ang pambansang industriyalisasyon, labanan ang bukrukrata kapitalismo na mistulang sisidlan ng mga linta na humihigop sa yaman ng bayan, suportahan at ipagwagi ang mga progresibo, makabayan, at makamamamayang kandidato sa lokal at pambansang posisyon, labanan ang pandaraya at karahasan kaugnay ng eleksyon na maaaring pagkublian ng mas matinding panunupil at ektra-hudisyal na pamamaslang, mapanagot sa mga karumal-dumal na krimen ang mga Duterte, at mawakasan ang talamak na pangunungurakot ng mga Marcoses at Romualdez sampu ng kanilang mga kawatang alipores.

Bilang isang rebolusyonaryong organisasyon ng mga guro, tungkulin ng Kaguma na ilantad ang kahungkagan at panlilinlang ng eleksyon, isiwalat ang kabulukan at kabiguan ng malakolonyal at malapyudal na lipunan, at ipalaganap ang programa ng pambansang demokratikong rebolusyon. Mahigpit nating tanganan ang demokratikong rebolusyon ng bayan at pagtatayo ng demokratikong gobyernong bayan na tunay na kumakatawan at nagsusulong sa interes ng aping mamamayan at patriyotikong uri bilang solusyon sa pamalagian at papalalang krisis ng lipunan.

Magpursige tayo sa pagmumulat, pag-oorganisa, at pagpapakilos sa masang guro upang mapalawak at mapasigla ang rebolusyonaryong kilusan na sumusuporta at umaanib sa armadong rebolusyon, at ganap na mawakasan ang pagsasamantala sa mamamayan ng imperyalismo, pyudalismo at burukrata kapitalismo. Matapos ang halalan ng 2025, mananatili pa rin naman ang salot ng ating lipunan. Ngunit dapat nating hamigin ang malawak na hanay ng masa para sa pambansa-demokratikong kilusan habang nasa panahon ng eleksyon at lalo na pagkatapos ng eleksyon upang tuluyang mahiwalay ang pangkating Marcos at Duterte sa mga progresibong pwersa at masa.

Hikayatin at akayin natin ang mga masang guro na sumama sa pambansademokratikong pakikibaka. Bigyan natin sila ng mga edukasyong pangmasa, mga kursong pang-Kaguma para mapalalim nila ang kanilang pulitikal na kamulatan at marekruta sa ating hanay. Hindi dapat titigil ang ating pag-organisa at pagpapakilos sa kanila pagkatapos ng eleksyon.

Sa pagsusulong at pagpapanalo ng demokratikong rebolusyong bayan lamang magkakaroon ng pagkakataon na mapaunlad ang sistema ng eleksyon bilang isang makabuluhang ehersisyong pulitikal at tunay na demokratikong proseso na nagsisilbi sa kagalingan ng sambayanan. Palakasin natin ang sigaw ng mulat na mamamayan: REBOLUSYON, HINDI ELEKSYON, ANG TUNAY NA SOLUSYON!

GURO AT MAMAMAYAN, TUMUNGO SA KANAYUNAN, SUMAPI SA BAGONG HUKBONG BAYAN!

IPAGTAGUMPAY ANG DEMOKRATIKONG REBOLUSYONG BAYAN! KAGUMA-NDFP