Base sa pamatbat sang rebolusyonaryong korte sang pumuluyo, ang silot nga kamatayon ginpatuman sa kay Arnie “Pane” Tuparan, 47 anyos, pasado ala 7:00 sang gab-i sadtong Nobyembre 14 sa iya balay sa Sito Taytay 2, Barangay Carabalan, Himamaylan City, Negros Occidental. Apat ka manugbo nga mga armas kag isa ka laptop ang nakuha gikan sa iya.

Ang aksyon militar ginpatigayon sang isa ka yunit sang Romeo Nanta Command (RNC-NPA) sang South Central Negros Guerilla Front. Ang desisyon sang rebolusyonaryong korte naghalin sa mabug-at nga basehan nga si Tuparan bat-ulan nga intel aset sang AFP nga aktibo nga nagapangita sang NPA sa iya erya. Iya gingiyahan ang mga tropa sang militar sa isa ka reyd nagligad nga 2023 sa Sitio Palosais, Barangay Mahalang, Himamaylan City. Ang gin-target nga yunit madasig gilayon nga naka-atras nga wala sang armadong engkwentro nga nahitabo batuk sa kaaway.

Magluwas pa diri, aktibo man si Tuparan sa pagpatigayon sang napaslawan kag korap nga E-CLIP kag sang NTF-Elcac paagi sa pagpwersa sang sobra 40 ka residente sa bukiron nga bahin sang sityo sa Barangay Carabalan nga mag-surender bisan pa mga sibilyan lang ini. Iya ginapahog yadtong ginasuspetsuhan nga may angot sa rebolusyonaryong hublag, ginared-tag sila, kag sa ulihi ginatugyan sa militar bilang mga surenderee agud mag-ganansya gikan sa cash grants kag subsidyo halin sa peke nga programa sang sadto US-Duterte kag subong US-Marcos II nga rehimen.

Gin-abusohan man ni Tuparan ang iya pusisyon bilang forest guard paagi sa pagpugong kag pagkumpiskar sang produkto nga uling sang pumuluyo. Nagademanda man siya sang toll fee sa maga-agi nga mga trak sa dalan malapit sa iya balay. Iya man ginagamit ang iya pusisyon agud mang-agaw duta sa mga mangunguma sa erya.

Sa pihak nga bahin, sa amo man nga barangay, ginpaandaman kag gin-disarmahan sang mga Pulang hangaway si Arnel Recaido, 48 anyos, residente sang Sitio Bulod, sa pag-akto nga giya sa mga operasyon militar, nagapamahog kag nagared-tag sa mga residente sa erya. Isa ka malip-ot nga armas ang nakumpiskar sa panahon sang operasyon.

Ining aksyon nabase halin sa demanda sang pumuluyo para sa hustisya sang mga biktima sang pilit nga pagpasurender, pagpangkilkil, pagpang-agaw sang duta, kag pagpangkumpiskar sang mga produkto kag kahoy para sa balay. Ang mga silot magaserbe man nga paandam para sa mga traydor sang rebolusyon kag mga aset sang militar nga padayon nga naga-atake sa mga inosente nga pumuluyo kabaylo sang kwarta gikan sa reaksyonaryong gobyerno. Ang RNC-NPA indi magpangduha-duha nga mag-akto base sa rebolusyonaryong hustisya sa yadtong napamatud-an nga nakahimo sang krimen batuk sa pumuluyo kag sa rebolusyon. Ang rebolusyonaryong bayolensya mabatyagan lamang sang mga kaaway kag mga malain nga elemento nga nagatib-ong sang pagpanghimulos kag pagpamigos sang mga nagahari nga sahi.###