Lubos nga ginakundenar sang Romeo Nanta Command-New People’s Army (RNC-NPA) ang pagpanghalit sang mga tropa sang 94th IB upod sa mga traidor sang rebolusyon sa una nga semana sang Enero 2025 sa mga bukiran nga barangay sang Himamaylan City, Negros Occidental.

Sadtong Enero 3, gingapos kag ginpahog sang nasambit nga militar si Jinky Tasi, sa tion nga wala ang iya bana sa balay, sa Sityo Kambudlis, Barangay Mahalang. Ila man ginpangransak kag gintamnan sang ebidensya ang mga kaingod nga balay sa amo man nga petsa. Nagpakuno-kuno nga mga NPA ang mga soldado.

Ang amo man nga tropa ang nagkastigo sa ila ni Hernan kag Imyong Sabanal kag Joel, Nene, kag Indot Pacheco samtang naga-obra sa Sityo Kalope, Barangay Carabalan, Himamaylan City sadtong Enero 5. Ginbutangan pa sang plastic ang ila mga ulo samtang ginatapungol sang mga militar. Pagkatapos sini, ginransak kag ginwas-ag ang mga kagamitan sang balay ni Evelyn Balsimo sang Sitio Tigbao, Barangay Buenavista sa amo nga banwa.

Samtang iligal nga gindakop sang nasambit nga militar si Jonel Balsimo kag gin-embargohan sang iya motor sa banwa sang Binalbagan, Negros Occidental, sadtong Enero 4. Pilit man siya nga ginapagiya sa naga-operasyon nga tropa sa Barangay Carabalan, Himamaylan City sa sunod nga mga inadlaw. Ginpilit pa siya nga makipagtapungolay sa isa sa mga surrenderee nga nag-upod sa operasyon militar.

Ini nga mga krimen nagapamatuod lang nga ang 94th IB tampad sa ila pasista nga karakter bilang protektor kag ido-ido sang nagahari nga sahi. Ang ini man nga mga krimen amo ang dugang pagpamatuod nga sila mismo ang nagatudlo sa pumuluyo nga magbato para sa ila kinamatarung nga mabuhi nga hilway kag lab-uton ang matuod nga hustisya.