Bisan sang pasulit-sulit nga deklarasyon sang 303rd IBde nga ara na sa State of Stable Internal Peace and Security (SIPS) ang isla sang Negros, wala untat ang militarisasyon sa kabukiran ilabi na sa Central nga bahin sang isla. Sang pagsulod sang bag-ong tuig, ginsug-alaw sang mga residente sang Barangay Trinidad, Guihulngan City, Negros Oriental sang mga kalakasan nga ginkomiter sang 62nd IB.

Sining Enero 16, liwat nga ginransak ang balay ni Emie Dayono, may mga kabataan (lakip ang tatlo ka menor de edad). Samtang wala tawo ang ila balay, ginsaka ini sang mga pasistang tropa sang 62nd IB kag ginkuha ang cellphone nga nakita sa sulod sang balay. Nag-abot ang iya anak nga si Jumong Dayono, 16 anyos, halin sang pagpangumpay para sang ila kasapatan kag ginpaidalum sang mga soldado ang bata nga Dayono sa interogasyon. Pilit siya nga ginpasugid kon diin ang mga NPA. Bangud wala ini nakasabat sa kahadlok, ginlampusan siya sang karit sa ulo nga nagresulta sa pagkabukol sang iya ulo.

Madumduman nga si Jumong Dayono ginkastigo man sa amo nga militar sadtong Nobyembre 5, 2024. Buot hambalon, ikaduha na ini nga beses nga natabo nga pagpangkastigo sa menor de edad.

Nag-abot ang mga tropa sang 62nd IB kag nagpatigayon sang Retooled Community Support Program (RCSP) sa nasambit nga lugar sadtong Enero 6, sang gab-i kag nagtiner ini sa Candalanon Road, malapit sa balay sang kapitan sang baryo sa Barangay Trinidad tubtob subong.

Ini nga lugar populado kag indi man malayo sang mga pangsibilyan nga institusyon kaangay sang eskwelahan kag gym sang barangay. Magluwas sini, ginabalay-balay ang mga residente sa tabon sang kuno pagpatigayon sang census.

Sa panahon nga ara ang mga militar sa lugar, madamo ang reklamo sang mga pumuluyo bangud sang mga anti-sosyal nga mga aktibidad nga ginpalapnag sang mga soldado. Partikular sini, naga-videoke sang dis-oras sang gab-i nga nagadisturbo sang pumuluyo nga lapyo halin sa ila obra, pag-inom kag pagmaoy tubtob sang pagpalupok, kag nagapanahor.

“Maathag nga indi lang sa aton rebolusyonaryong pwersa pati na sa bilog nga pumuluyo sa Central Negros nga ang pagtiner sang 62nd IB sa lugar, laragway sa ginpasingki nga militarisasyon sa kabukiran, ang desperasyon sang kaaway nga pamatud-an nila ang ila ginpabugal nga kadalag-an. Indi matabunan ang kamatuoran nga sang tion sang ila pag-estar sa mga komunidad, wala sila sang iban pa nga ginahimo magluwas sang padayon nga pagpalapnag sang kakugmat kag kahadlok paagi sang pagpanglapas sang tawhanong kinamatarung sang pumuluyo,” haambal ni Ka JB Regalado, tagpamaba sang Leonardo Panaligan Command-New People’s Army (LPC-NPA).

Dugang pa niya, “Gani, ang mga aktibidad sang 62nd IB halin sang unang semana sa Enero, lubos nagabayolar sang Comprehensive Agreement on Respect for Human Rights and International Humanitarian Law (CARHRIHL).”

Nanawagan man si Regalado sa mga pumuluyong Negrosanon nga pabakuron ang ila panindugan kag ipakigbato ang ila tawhanong kinamatarung.

Sa atubang sang banggianay sang mga Marcos kag Duterte kag sang nagahana nga gyera sa tunga sang mga imperyalistang pungsod kadungan sa pagpasingki sang pasismo, wala sang iban pa masaligan ang mga Negrosanon agud mahilway kon indi ang ila pagpakigbahin sa rebolusyon nga nagapanguna nga nagsabat sa problema sang duta, gutom, kag kaimolon sang mga pumuluyo. Pinaagi lamang sini malab-ot ang matuod nga kahilwayan kag hustisya sosyal.