Hugot nga gibatukan na National Democratic Front-North Central Mindanao Region (NDF-NCMR) ang planong sa Department of Natioal Defense (DND) nga magtukod og 200-ektaryang baseng naval sulod sa Phividec sa Tagoloan, Misamis Oriental. Ang maong baseng naval mao kuno’y mamahimong sentro sa mga operasyon sa Philippine Navy sa Visayas ug Northern Mindanao ug magsilbi kuno kining dunggoanan sa moabotay nga mga frigates (barkong igugubat) gikan sa South Korea.

Dugang pa, nagpadayag og kabalaka ang katawhan sa Cagayan de Oro, labina ang Oro Chamber of Commerce and Industry, sa pagahimoon sa DND ug Phividec. Dugay na usab ang hangyo sa mga mag-uuma sa prubinsya nga ihatag kanila ang di produktibong yuta aron matamnan kini para sa pagkaon. Imbes nga kini, giuna pa sa rehimeng Marcos ang pagtukod sa usa na pud ka base militar.

Kung ilambigit sa pagpanghulhog og gubat sa US batok sa China, angayan lang nga mabalaka sa ilang seguridad ang katawhan sa Cagayan de Oro ug Misamis Oriental sa maong plano sa DND ug Phividec. Tungod kay ang maong baseng naval pwede kaayong mahimong laing dayag o sekreto nga EDCA site para pundohan sa mga tropa ug himang igugubat sa US ug ubang imperyalistang nasud.

Ubos sa kasabutang EDCA, nahimong usa ka base militar ang tibuok nasud tungod kay mahimong magkampo ang mga tropang Kano sa bisan asang kampo militar, modunggo ang ilang barko sa bisan asang pantalan, motugpa ang ilang mga sakyanang pangkahanginan sa bisan asang tugpahanan, ipundo ang ilang mga himang igugubat sa bisan asang pasilidad sa AFP-DND.

Busa, gawas sa Lumbia Air Base nga deklaradong EDCA site, laing duha pa dayon ka dagkung kampo ang mamahimong base militar sa US sa sulod ug duol sa Cagayan de Oro, sama sa 4th ID Headquarters sa Patag, Cagayan de Oro City ug ang pagatukorong naval base sa Phividec. Dili gyud ikapakamenos ang posiblilidad nga himoon kining base militar sa US kay gihimo man gani nila kini sa Mindanao Training Center sa Camp Kibaritan, Kalilangan, Bukidnon kung diin nagpundo ug nagbansay didto ang mga tropang langyaw.

Makita nato dire ang mamahimong kagrabehon sa pangmilitar nga pagpanghilabot sa US ug ubang imperyalistang nasud kay ang ilang air force, infantry ug dayon, ang navy mahimong magbase na sulod ug palibot sa Cagayan de Oro.

Makita sab nato ang kagrabehon sa hulga sa kinabuhi sa katawhan kay mamahimong target sa pagpangatake kining maong mga kampo kung ugaling mahitabo ang armadong panagbangi tali sa US ug China.

Gawas niini, ang maong proyekto nagpakita lang unsaon pagwaldas sa DND-AFP ang pondo niini. Sama sa katugbang niini nga mga burukrata kapitalista sa “sibilyang sektor” sa reaksyunaryong estado, ang mga burukrata kapitalista nga anaa sa AFP-DND nagkabuang usab og pasa sa lain-laing proyektong pang-imprastraktura. Sama sa mga burukrata kapitalista sa “sibilyang sektor”, nag-apas usab sila sa kurakot nga makuha gikan sa maong mga proyekto.

Busa ang atong pagbatok niining pagatukorong baseng naval aron panalipdan ang kinabuhi sa mga lumulopyo nga anaa palibot niini, hugot nga kasumpay sa atong pakigbisog alang sa pagpanalipod sa nasudnong soberenya ug pagbatok sa korapsyon.

Kinahanglan ipunting ang atong pakigbisog sa pagpahawa sa rehimeng Marcos Jr tungod kay iyang gibutang sa grabeng peligro ang kinabuhi sa katawhan pinaagi sa pagpasulod niining mga langyaw’ng armadong pwersa. Busa ang presidente nga si Marcos Jr dili lang Amo sa mga Kawatan ug Hari sa mga Burukrata Kapitalista, siya usab ang Pinakamasulondong Itoy sa US.