BHB-Northern Samar, gin-amkon an madinaugon nga ambus ha Mapanas

Ini nga artikulo mayda han huba ha English

Gin-amkon yana han Bagong Hukbong Bayan (BHB) ha Northern Samar an madinuagon nga ambus kontra ha mga elemento han Armed Forces of the Philippines (AFP) ha Barangay Magsaysay, Mapanas kakulop han kaagahon.

Gin-gamit han mga Pula nga mangaraway an usa nga command-detonated explosive (CDEx) kontra ha mga tropa han 20th Infantry Battalion ngan 63rd IB nga naghihimo hin combat patrol nga operasyon ha gawas han barangay. Diri mamenos ha pito nga pasista nga tropa an nasamaran diin duha an kritikal an kundisyon, sigon ha mga inisyal nga report.

Sigon kan Ka Amado Pesante, tagapagyakan han Rodante Urtal Command han BHB ha Northern Samar, baton an ira taktikal nga opensiba ha demanda han katawhan para ha hustisya ha hiluagan nga panalapas ha katungod, sistematiko ngan pwersahay nga pagpasurender han mga sibilyan, ngan dislokasyon han pakabuhi han mga parag-uma nga gindurot han panmilitar nga okupasyon ha ira mga komunidad.

Diri mamenos ha 63 nga sityo ngan barangay ha erya han Pacific, nga nalupgop ha mga bungto han Mapanas, Palapag, Gamay ngan Lapinig, an ginpailarum ha mas grabe nga presensya han militar tikang hadton naglabay nga tuig. Gin-alegar han AFP pinaagi han 8th Infantry Division nga 26 hini nga mga baryo “malimpyo” na han impluwensya han BHB.

Ginsering ni Pesante nga an taktikal nga opensiba usa nga tampalo ha nawong han kumander han 8th ID nga hi Major General Edgardo de Leon sugad liwat han iya mga igkasi unob nga buwaon ha 803rd Infantry Brigade ngan 20th IB nga gin-uuru-utro an iskrip nga nagluya na o kulang na hin panmasa nga suporta an BHB ha prubinsya.

Kaparte liwat an mga baryo ha rPacific han 229 nga barangay ha Northern Samar nga gindeklara han Provincial Task Force-Elcac ha panguna han 803rd IBde hadton Marso nga “lilimpyuhan” nira han presensya han BHB ha katapusan han Hunyo. Ginsering ni Pesante nga tikang hadto, nakamonitor hira han presensya han gatus-gatos nga tropa han Philippine Army ha mga baryo ha prubinsya.

“Linahos na an ira dedlayn ngan pakyas na hira. An BHB usa nga hukbo han parag-uma nga, bisan kun naaarmasan hin mas magluya nga armas, nagdaug ha agway kontra ha AFP tungod ha ira puthaw nga determinasyon ngan suporta han masa nga nananawagan gud para ha rebolusyunaryo nga hustisya,” sering ni Manuel.

Nagpahimatngon hi Pesante nga samtang nagpapadayon an panmilitar nga okupasyon han mga komunidad han parag-uma ngan naungbaw an dunot nga sistema nga ginpapanalipdan han AFP, sigurado nga maglalansar pa an BHB ha Northern Samar hin mas damo nga taktikal nga opensiba, labina nga nakatalaan an bag-o nga niyutiyo nga presidente nga hi Ferdinand “Bongbong” Marcos Junior nga ighatag an iya syahan nga State of the Nation Address ha sakob hin pira kasemana.

“Ha pagselebrar hini nga kadaugan, kaupod han BHB ha Northern Samar an masa nga mabayanihon liwat nga gin-aatuhan an pasista nga pangatake han militar. Padayon kami nga maglalansar hin mga taktikal nga opensiba ha kabaryuhan ngan ha mga bungto ngan syudad, ngan mas tatargeton an mga pinakagindidiri nga pasista ngan mayda pinakadagko nga utang nga dugo ha masa,” pagtapos niya.

BHB-Northern Samar, gin-amkon an madinaugon nga ambus ha Mapanas