Gintigayon sang 3rd Artillery Battalion kag 15th IB ang ila nga bomb testing sadtong Agosto 16 nga naghulog sang 14 ka bilog nga bomba sa Sityo Don Jose, Barangay Manlucahoc, Sipalay City, Negros Occidental. Nagsugod ang ila nga pagpangbomba sang alas 9:30 sang aga tubtob alas 8:30 sang gab-i. Kasugpon ini sang kaangay nga bomb testing sadtong Setyembre 27 tubtob 30, 2022 sa amu gihapon nga lugar.

Gin-miting sang Armed Forces of the Philippines (AFP) sadtong Agosto 15 ang mga residente sa mga sityo nga malab-otan sang halit sang bomb testing. Isa lang ka adlaw ang ginhatag sa tropa militar agud mapanghimos sang pumuluyo ang ila mga kagamitan kag kasapatan nga nahamtang sa ila mga uma parehas sang baboy, manok, baka, kanding kag karabaw. Ginpabakwit ang mga residente kag ginhatagan sang isa ka adlaw nila nga kunsomo (5 kilos nga bugas, 5 ka lata sang sardinas, 3 ka pack sang noodles kag 1 kilo nga bihon).

Indi magpasugot ang mga residente apang wala na sila sang mahimo bangud ginplastar na sang AFP ang ila mga bomba kag kagamitan. Suno sa representante sang mga pwersa sang estado, may pahanugot ni Barangay Captain Sergio Libre sang Barangay Manlucahoc kag Sipalay City Mayor Gina Montilla Lizares ang pagpamomba. Dugang pa sang AFP nga sa bilog nga Negros, ang LGU lang sang Sipalay ang nagpasugot kag nagpahanugot nga himuon ang bomb testing.

Indi mabayaran sang pilak ang nabatyagan sang pumuluyo nga kahadlok, kakulba kag kabalaka sa natabo nga pagpamomba ilabi na gid sa mga kabataan kag mga tigulang. Kaangay ini sang natabo nga pagpamomba sang nagligad nga tuig nga nagresulta sa pagkapatay sang duha ka karabaw ni Divina Flores nga tubtob subong, wala ginbayaran sang AFP. Nadala naman sa ospital si Erinea Dinulan, 64 anyos, bangud sa grabe nga kahadlok. Ginreklamo sang pamilya ang gasto sa ospital pero wala ini ginsabat sang AFP. May nadula man nga baboy kag iban pa nga kasapatan nga wala man ginbayaran.

Ini tanan ginreklamo sang mga residente sa miting nga ginpatawag sang AFP. Ang rason sang AFP nga wala ginpa-blotter ukon ginreport sa Barangay Manlucahoc kag Sipalay City ang mga insidente.

Ang mga apektado nga lugar amo ang mga sityo sang Sto. Nino (25 ka bubong), Don Jose, Dong-i, Lepanto, Kaiwanan sang Barangay Manlucahoc kag Barangay Camindangan, Sipalay City, Sityo Quarry (7 ka Bubong) sang Barangay Damutan, Hinobaan kag Barangay Gatuslao, Candoni. Diri nga mga lugar nahamtang ang mga minahan sang Lepanto Mining, Colet Mining kag Selenga Mining. Katambi man sini ang nahamtangan sang Philex Mining sang Barangay Nabulao, Sipalay City.

Ang pagpamomba kabahin sa mga tikang sang mga dalagku komprador kag agalon mayduta agud mahatagan sang dalan ang pagpanghimulos sa mga dunang manggad sa lugar paagi sang AFP kag lokal burukrata kapitalista. Nagapahapos man ini para sa mga iskema sang pagpang-agaw sang duta.

Ang Barangay Manlucahoc lakip sa proyekto sang National Greening Program (NGP) sa pagpananom sang kawayan nga lapnagon sa Southwest Negros. Nagsulod man ang palm tree plantation sa kasikbit nga mga banwa sang Sipalay sa diin mayoriya sang 6,000 ka ektarya nga plantasyon yara sa banwa sang Candoni.

Ang ini nga mga proyekto kaangay sang bomb testing sang AFP nakatuga sang kahalitan sa pumuluyo ilabi na sa mga mangunguma sang Candoni, Hinobaan, Ilog, Cauayan, Kabankalan City kag Sipalay City.