Makinasudnong pagtimbaya!

Kumusta? Sigurado ko, galibog na pud imong ulo karon unsaon pagsugakod sa bulan ug pagbuhi sa imong pamilya. Sa pasalig sa gobyerno, naa kuno’y P12,500 ug usa ka sakong bugas kada bulan. Pero himan-himan, P3,500 ra ang muabot, di pa gyud kada bulan! Nuon, makautang ra man ka sa regular nga C.O. bahala’g naa’y patong. Ambot kaha pud kay suno sa mga balita naa na man ang sweldo pero gihawiran ra ni Sir nya gipautang para makaginansya siya.

Bisag unsaon og inat sa imong gamayng sweldo, dako ra gyud nga kulang sa panginahanglanon. Bugas, sud-an, tambal, hasta gani gasolina, nagkamahal na. Pero imong sweldo minus na, tanggong pa. Pakapinan pa’s Tanduay ug Kulafu, tari ug hantak, samot gyud ning mapobre ang kapobrehon. Wala gyud ka’y laing kapaingnan, utang sige kang Sir hangtod nga magkadako ug magkadako.

Pero si Sir, ug si Duterte, maayo ra man ang pahiyom. Kinsa pud ang dili malipay nga gawas sa daghan pa silang mabulsa nga pondo, dili man pud sila’y ihungit ug ipauna matag operation. Ikaw man. Ikaw ra pud ang duklon, papush-upon, o kapila padalaganon sa kampo kung dili magkadimao na imong obra. Mao pa’y apiki na ang sweldo, apiki pa imong kinabuhi. Gawas nga gikwartahan na, gipaon pa pud ka.

Ang ingon ana nga kinaiya sa AFP, lakip na ang NTF-ELCAC nga gipamunuan ni Mayor Gido Reyes sa Guihulngan, gapaklaro lang nga dili sila kasaligan ug wala’y pakialam sa imong kinabuhi. Samot na kung mahubas na ang ilang kwarta nga gihuthot, ug mawala na sa poder ang ilahang commander-in-chief nga Duterte.

Pero basin ang gibarugan nimo, “Sige lang, basta makaalagad sa nasud para sa kalinong ug kalambuan.” Pero ‘matay no, mura’g dili man makalinong ning sige ka’ g panghulga, pagpabuto, ug pagpamatay sa mga silingan nimo’g kaila kay lagi, NPA kuno. Bisan og unsaon pa’g panghambog nila’s radyo nga gamay na lang ang NPA kay wala na’y nagsuporta, sige man gihapon ang engkwentro ug lagmit kamo pa’y maunhan.

Kung gusto man gyud ka nga mabuhi ang imong kaugalingon ug pamilya sa malahutayon nga pamaagi, maypa siguro’g mubalik ka sa baol o obra kay sigurado pa nga naa’y makaon ug masuporta sa pamilya. Layo pa ka sa utang ug disgrasya, ug sigurado nga respetuhon pud ka sa imong palibot tungod kay wala ka nagpasakit sa ilaha.

Gani, mas maayo pa gyud nga kung tibuok imohang kasingkasing nga mualagad sa katawhan ug itukod ang tinuod nga kalinong, muapil na lang ka sa hukbo sa katawhan isip pulang sundalo nga sa kanunay, tibuok-kusog nga gipalangga ug gisuportahan sa lapad nga katawhan.

Para sa masang gihimuslan,
JB Regalado