Wala-untat nga nagasabwag sang kahadlok ang pasista kag berdugong tropa sang 62nd IB sa mga pumuluyo sa mga binukid sang mga syudad sang Guihulngan kag Canlaon, tanan sang Negros Oriental.

Hunyo 23 sang gab-i—nagpinalupok kag patarasak nga nagpaniro ang “trigger-happy” kag uhaw sa dugo nga katapo sang 62nd IB sa Sityo Putat, Barangay Humay-humay. Nagtuga ini sang kahadlok kag kakugmat sa mga residente.

Hunyo 24 sang aga—liwat naman nga ginsaka ang balay ni Bobby Gemodo sa Sityo Laos, Barangay Binobohan sang 10 ka nakasibilyan kag armado nga tropa sang 62nd IB. Ginpahug man siya ni Orlando de la Peña, isa sa upod sa 10 ka tropa militar, nga patyon.

Si dela Pena isa ka surrenderee, nga masami ginagamit sang militar sa ila mga kalakasan batok sa mga inosenteng mangunguma.

Hunyo 24 sa hapon- liwat nga ginbalikan sang nasambit nga militar si Mario Noyad sa ila puluy-an sa Sityo Natae, Barangay Binalbagan, Canlaon City. Ginsita kag gin-akigan ang biktima kay nga-a ginpa-blotter sa mga kapulisan ang ila ginhimo nga pagpamahug pila ka adlaw ang naglabay.