Gikondenar sa New People’s Army (NPA) sa Northern Negros ang pinakaulahing drama nga gihimo sa 79th IB sa Toboso aton ipagawas sa publiko nga nagmadaugon ang ilang pakyas nga kontra-insuhensyang kampanya.

Matud pa ni Ka Cecil Estrella, tigpamaba sa Roselyn Jean Pelle Command (RJPC-NPA), nga walay nahitabong engkwentro sa Sityo Tauma, Barangay Bandila, Toboso, Negros Occidental niadtong Disyembre 13 sa hapon. Walay yunit o tropa sa RJPC-NPA nga naglihok sa maong lugar.

Dugang ni Ka Cecil, ang Sityo Tauma duol lang (dili makaabot sa usa ka kilometro) sa CAA detachment sa Sitio Bisinsina. “Dakong kataw-anan ang napiling lugar sa 79th IB nga lunsaran sa ilang pekeng engkwentro. Dili katuohan sa publiko nga magbase ang NPA sulod sa perimetro sa detatsment sa ilang paramilitar nga yunit,” pagpatin-aw ni Ka Cecil.

Nagpakita kini sa desperasyon sa 79th IB taliwala sa kapakyas sa iyang hugaw nga kontra-rebolusyonaryong gyera nga dugmokon ang rebolusyonaryong kalihukan sa Nothern Negros, matud pa ni Ka Cecil.

Sukad sa bulan sa Septembre walay hunong ang mga dinagko ug sustenido nga atake sa 79th IB. Giatubang kini sa RJPC-NPA sa gerilyang kontra-kampanya diin malampuson nga giharas niini ang 18-ka-tawo nga yunit sa 79th IB sa Styo Agtatajor 1, Barangay Macasilao, Calatrava, Negros Occidental niadtong Oktobre 6 nga gisundan sa pagsilot sa ilang supog nga intel aset sa Sitio Hoybesan, sa maong barangay niadtong Oktubre 16, ug aktibong nakadepensa sa usa ka engkwentro sa Sityo Agtutugas, Barangay Cambayubo, Calatrava niadtong October 22. Kini nga mga panagsangka nahitabo sa maong lungsodd nga maoy gikonsentrahan sa dinagkong operasyon sa 79th IB.

“Aron tabunan ang ilang kapakyasan ug dugang makakorap sa pundo sa operasyon sa AFP, naghimo ang 79th IB og pekeng engkwentro ug ubang pang drama nga pugos nga gipatuo sa publiko,” panapos ni Ka Cecil.

Sa pikas bahin, hugot nga gipanghimaraut sa Pambansang Katipunan ng mga Magbubukid (PKM)-Northen Negros ang gihimong pagdakup sa usa ka sibilyan sa Sityo Malig-on, Barangay Bandila, Toboso kagahapong adlawa, Disyembre 14. Gidakop sa hiniusang pwersa sa 79th IB ug kapulisan si Melba Gabriel ug gipagawas nga usa ka “key leader” sa rebolusyonaryong kalihukan.

“Naandan na nga binuhatan sa pasistang militar sa pagsangil sa mga sibilyan ug pagpahamtang sa ginama-gamang kaso. Nagpakita kini sa ilang tinuod nga kinaiya isip kontra-katawhan ug reaksyunaryong armadong pwersa sa nagharing hut-ong. Ang nahitabo ni Gabriel pagpamatuod nga walay masandigan ang katawhang kabus sa kabukiran kundili ang NPA ang mao ang tinuod nga sundalo sa katawhan ,” matud pa ni Ka Guillermo Mahilum, tigpamaba sa PKM-Northern Negros.

Nanawagan si Ka Guillermo sa katawhan nga nag-atubang karon nagkagrabeng militarisasyon ug terorismo sa estado nga dili mahadlok, maghiusa ug makigbisog aron panalipdan ang ilang mga demokratiko ug tawhanong katungod.