Ang Negrosanon karon, ilabina ang gikan sa North Negros, kinahanglan mupadayon sa paghimo sa tanang porma sa pakigbisog para mahikyad, malaragway ug maplastar ang epekto sa grabeng sosyo-ekonomikong krisis ug mapadangat ang mga handum ug damgo sa ordinaryong Pilipino.

Nag-atubang karon ang katawhang Pilipino sa grabeng krisis tuga sa kawala’y pulos sa reaksyunaryong gubyerno nga ipaseguro nga maabot sa ordinaryong lumulupyo ang batakang panginahanglan. Wala’y interes ang anaa sa poder nga kontrolon ang presyo sa lana, bugas, lamas, isda ug uban pang batakang panginahanglanon sa pamilyang Pilipino. Gani, mas ginaduso pa sa mga nagharing hut-ong nga mapalapad ang ila propyedad ug mudako pa ang ilang ganansya paagi sa pagbaligya sa manggad sa atong nasud.

Kadungan niini, naglala pa ang pagpamintas sa reaksyunaryong armadong grupo. Wala’y pili ang ila pagpangatake pareho sa ordinaryong sibilyan ug mga rebolusyonaryong pwersa.

Mahinumduman nga kaniadtong Setyembre 30, 2021, wala’y kaluoy nga gipaarakan ug gipangdunggab ang upat ka mga rebolusyonaryong nagmasakit samtang temporaryong nagpaayo sa usa ka panimalay sa Hda. Builders, Barangay San Pablo, sa lungsod sa Manapla, Negros Occidental, samtang laing duha ka residenteng sibilyan ang gidagit (ug gituohang gi-salvage) sa pasistang tropa nga hangtod karon wala pa nabalik sa ilang pamilya. Gidayeg pa sa reaksyunaryong gubyerno ang maong buhat sa pasistang tropa sa 79IB sa AFP, ug SAF6 ug Manapla MPS sa PNP.

Gipasidunggan nato pag-usab sila Marilyn ‘Ka Monet’ Badayos, Rufino ‘Ka Simo’ Bocaval, Ronilo ‘Ka Wowie’ Desabille, ug Rudy ‘Ka Brod’ Carbajosa, mga rebolusyonaryong nahimong martir sa laing dapit para alagaran ang mga mamumuo sa katubhan nga mapasaka ang ila suhulan ug mapalambo ang ila panginabuhian. Gihinumduman man nato silang Hector Maquiling ug Ernesto Baynes, parehong mag-uuma ug residente sa maong lugar, nga kadungan sa panghitabo, gidagit sa otoridad ug hangtud karon ginapangita sa pamilya.

Sa giatubang sa katawhang Negrosanon nga grabeng krisis, nakigbisog
na ang ordinaryong Negrosanon. Bisan sa social media makita ang grabeng reklamo ug pagpangita og hustisya. Ang pipilang indibidwal gipaagi sa komedya ang kahimtang sa kamahal sa bugas ug sa dili pagsalig sa pulis paagi sa komposo (kanta).

Karon, gikinahanglan ang tanang tinguha sa rebolusyonaryong pwersa nga muhimo sa tanang paagi ug porma sa pakigbisog para mahatagan alibyo ang kahimtang sa ordinaryong Pilipino. Magdungan kita sa pagpangita og hustisya sa tanang biktima sa sosyo-ekonomikong krisis. Ipanawagan man nato ang pagpangita sa hustisya sa tanang rebolusyonaryong gipamatay sa estado.

Hustisya para sa Manapla 4+2!
Hustisya para sa tanang biktima sa pasistang estado!
Makigbisog, dili mahadlok!s