Sa pagsaulog sang ika-57 nga anibersaryo sang New People’s Army (NPA), nagahatag sang pinakamataas nga pagsaludo ang Romeo Nanta Command-New People’s Army (RNC-NPA) sa mga Pulang kumander kag mga hangaway sa bilog pungsod, ilabina sa mga martir nga naghalad sang ila kabuhi agud mapangapinan ang interes sa pumuluyong Negrosanon kaangay ni Reynalde “Ka Amek” Erecre nga nagserbi bilang sekretaryo sang Partido sa rehiyon sadtong buhi pa siya, “Ka Joem” Golez, Ruben ” Ka Marcos” Tingal, Ritchie “Ka Akiro/Makoy” Verano, Milky “Ka Gorting/April” Sampini, kag Joedil “Ka Junjun” Balsimo.

Indi manegar ang dako nila nga amot sa pagsulong sa armadong paghimakas paagi sa pagpatuman sa ikatatlo nga kahublagan panadlong sa isla sang Negros. Nagserbe sila nga modelo sa mga bag-ong sibol nga mga Pulang hangaway subongman sa mga dumaan. Gani, ang ila pinakataas nga sakripisyo ang magahangkat sa pumuluyong Negrosanon nga maghimakas tubtub maagum ang hustisya sosyal, matuod nga demokrasya, kag pagbag-o nga nagahatag pagtamod sa kaayuhan sang kadam-an.

Ara subong ang tanan nga rason agud magpartisipar ang pumuluyong ginapigos kag ginahimuslan sa demokratikang rebolusyon sang banwa. Sa paglala sang pangkalibutanong krisis nga gingatungan sang agresyon kag pagpasilabot sang US sa soberanya sang iban nga mga pungsod kaangay sang Cuba, Venezuela, Iran kag iban pa, nahalitan sang dako ang Pilipinas isip neokolonya sang imperyalistang US. Gani, wala nakaluwas ang malapad nga masang Negrosanon sa mga epekto sini.

Bangud nahigot ang Negros sa monocrop nga industriya sa dikta sang mga dalagkung komprador-burgesya kag mga agalon mayduta nga mga tuta sang imperyalistang US, nagapabilin nga nangunang problema sa mga pumuluyo ang kawad-on sang duta, manubo nga suhulan kag halos wala sang benepisyo, taas nga usura kag kakulang sang serbisyo sosyal. Ma nagkuyapaw pa sila sa kaimolon subong sa pagtaas sang presyo sa mga balaklon kaangay sang bugas kag gasolina. Pait pa sa apdo ang sitwasyon sang mamumugon sa uma, mangunguma kag bisan ang mga small planters sa South Central Negros sang nagtaas ang ila galastuhan sa pagtikad sang duta, pag-atiman sang ila katubuhan, kag para sa adlaw-adlaw nila nga panginahanglanon.

Dugang na ini sa ila ginaatubang na nga mga problema nga resulta sang pagpatuman sang mga neoliberal nga mga palisiya sa isla labina sa padayon nga liberalisasyon kag deregulasyon sang langis. Halimbawa sini ang pagkahagba sa presyo sang kalamay kag napahigad nga lokal nga produksyon bangud sa sobra-sobra nga import sang mga dumuluong nga produkto. Amo man ang natabo sa produktong humay sa mga mangunguma sa padayon nga implementasyon sang Rice Liberalization Law.

Magluwas sa mga nasambit, bulnerable man ang mga pangabuhian sang mga pumuluyo sa South Central Negros sa pagsulod sa mga proyektong magadala sang ginansya sa mga politiko nga ginapakete nga para kuno sa kauswagan. Isa na diri ang 12-Billion tunnel road ni Mayor Raymond Tiongson nga perpektong rason para makalikaw nga makwestyon sang pumuluyo ang pagkutkot sang kabukiran sa erya.

Agud mapasiguro nga mapatuman ang ini nga mga mapangwasak nga proyekto, ginbubuan sang batalyon nga kusog sang tropa militar ang lugar para mapahipos nila ang pumuluyo kag pukanon ang rebolusyonaryong kahublagan sa South Central Negros. Wala pa matapos ang unang kwarto sang 2026, gin-okupar sang AFP, partikular na sang 94th IB, ang indi manubo sa pito ka baryo paagi sang ila combat operation kag Modified Community Support Program (MCSP). Doble ang ila pangtinguha nga matiplang ang pumuluyo sang ginapabugal sang reaksyonaryong gobyerno nga E-CLIP kag Amnesty Program, lakip na ang ila Barangay Development Program, nga kaangay sang flood-control projects, ginhimo sang gatasan sang mga politiko kag mga opisyal sang militar.

Indi na malipod nga paborable ang obhetibong kondisyon para sa pagpasulong sang demokratikong rebolusyon sang banwa labina sa armadong paghimakas. Idalum sang absolutong pagpamuno sang Communist Party of the Philippines (CPP), padayon ang mga yunit sang RNC-NPA upod ang rebolusyonaryong pwersa sa pagtungod sa tatlo ka integral nga hilikuton sa bilog nasakupan sini sa South Central Negros, base sa balayon sang ikatatlo nga kahublagan panadlong nga ginsugdan sadtong nagligad nga mga tuig.

Sa pihak sang pasulit-sulit nga deklarasyon sang AFP nga ‘dismantled’ na ang larangan sa South Central Negros, pasulit-sulit man ini nga ginpabulaanan sang RNC-NPA paagi sang paglunsar sang taktikal nga mga opensiba batok sa armadong makinarya sang reaksyonaryong gobyerno kag sa mga kaaway sa sahi. Halin Marso 2025, gintigayon ang lima ka punitibong aksyon batok sa mga ahente sang militar kag duha ka pagparalisa sa ekwipo sang quarry kag mapanghimuslanon nga agrikultural nga kompanya.

Tamparos sang nagaharing sahi ang wala nagakahubas nga suporta sang malapad nga masa dira sa ila hukbo ang mga nalunsar nga mga taktikal nga opensiba sa sulod kag guwa sa baseng masa bisan ara lang ang presensya sang militar kaangay sang pagsilot sang mapahimuslanon nga agalon mayduta nga si Anglo kon sa diin malapit lang sa syudad.

Bisan nag-atubang sa masingki nga operasyon militar ang larangan, tayuyon gihapon ini nga nakatungod sang hilikuton pagpalapad kag pagbukas sang mga erya nga wala nahulagan ukon lawig na nga nabiyaan sang NPA. Manipestasyon sini ang signipikanteng pagdako sa baseng masa halin Oktubre 2025 tubtob Marso 2026.

Dugang pamatuod diri ang mga bag-o nga natukod nga mga organisasyong masa sang PKM, KM kag MAKIBAKA — mga sektoral nga organisasyon sang mangunguma, pamatan on kag kababaenhan.

Madinalag-on nga natigayon ang mga PADEPA nga pagtuon sa ila hanay upod ang mga Pulang hangaway nga nagaarmas sa ila sa pagduso sang mga kontra-pyudal, kontra-pasista, kag kontra-imperyalista nga mga kampanyang masa.

Mas nagadalom kag nagalapad ang pag-ugat sang mga Pulang hangaway dira sa masa nga bisan ano kadamol sang gal-om, handa man ang masa nga manindugan upod ang matuod nga soldado sang pumuluyo para ipakigbato ang ila mga katungod kag huluhalintang nga ipundar ang demokratikong gobyerno sang pumuluyo.

Sa pagsulod sa ika-57 nga tuig, magapadayon ang RNC-NPA sa pag-aplikar sa husto nga gerilyang taktika para sa padayon nga pagpalapad, pagkonsolida, kag pagrekober sa base kag sonang gerilya samtang padayon nga ginapangimbabawan ang mga tendensiya kag huyog sang konserbatismo, empirisismo, kag burukratismo.

Magapaninguha ini nga padayon nga maglunsar sang mga punitibong aksyon kag mga batakang taktikal nga opensiba nga masarangan sini nga madaog ilabina sa paglagas sa mga traydor sa rebolusyon, mga yunit sang AFP, PNP kag paramilitar sini, mga malain nga elemento, kag sakon nga mga korporasyon ukon kompanya nga nagaduso sang makahalalit nga mga proyekto.

Kinahanglan mapataas ang inisyatiba sang mga Pulang hangaway sa politika kag militar para sa pagpasingki sang inaway banwa.

Para sa mas hugot nga pag-angkla sa Partido, mga Pulang hangaway, kag mga masang ginapigos kag ginahimuslan, kinahanglan ang dobleng pagtinguha sa hillikuton SICA para sa dasig nga pagsabat sa mga problemang ginaatubang sang pumuluyo. Mas mangin matinugahon man kita sa paghatag sang mga pagtuon kag mga edukasyon propaganda dira sa pumuluyo agud magpabilin nga sekreto ang mga pulong kag malikawan nga mabutang sa risgo ang seguridad sang bilog organisasyong masa.

Bangud sa padayon nga indi makatawo nga sistema sang pagtrabaho subong, manubo nga sweldo kag kulang sang benipisyo sa pihak sang wala tupong nga pagtaas sang presyo sang balaklon, kag iban pa nga porma sang pagpanghimulos kag pagpamigos idalom sa mala-kolonyal kag mala-pyudal nga sistema sang pungsod, makita sang pumuluyo nga ang armadong paghimakas lamang ang sarang nga makatapna sang mga mapang abuso nga mga agalon may duta, dagkong komprador, multi- kag transnational corporation nga nagapuga sa ila kusog-pangabudlay. Sigurado nga sa umalabot nga mga panahon bangud sa matambok nga duta para sa rebolusyon, mas magadako kag mas magdamo pa ang magsulod sang NPA.###