Download

Ang kumander sang 303rd Brigade nga si Brig. General Ted Dumusmog kinahanglan maglantaw sa espiyo antis siya magwakal sang mga mapaniplang nga mga binutig kag moral nga pagpostura, sa iya pagtawag sa rebolusyonaryo nga kahubalagan sang mga tinaga nga ginalaragway ang ila kaugalingon nga mersenaryo kag uhaw sa dugo nga tradisyon sang AFP: ‘purely murder,’ “nagatarget sang bulnerable ukon mga soft targets.’

Ang ila ginatawag nga sagunson nga pagpamatay nga wala bahid sang ideolohiya, sa punto de bista sang mga ginahimuslan kag ginapigos nga masa, rebolusyonaryong hustisya batuk sa mga traidor sa kahublagan, mga aktibo nga ahente sang militar kag mga masupog nga kriminal, nga tagatuga sang kahadlok kag kinagamo sa mga komunidad sang pesante. Laban sa ila mga kombatant, amo gani sa report sang NPA nga nakakuha sila sang 15 ka mga armas sa sini nga mga operasyon.
Ang ini nga mga indibidwal nga ginhampak sang kamot sang rebolusyonaryong hustisya indi simple nga mga inosente. Sa matuod, direkta sila nagaamot sa nagasingki nga mga pokus operasyon militar sa kaumhan, masami nagasirbe bilang mga giya sa operasyon kag nagapanudlo sa mga lider masa nga aktibo sa kontra-pyudal nga mga paghimakas masa sa tuyo nga sila pahipuson.

Sa idalum sang balayon sang National Action Plan for Unity, Peace and Development (NAP-UPD) ni Marcos Jr kag sang ‘whole-of-nation’ nga patakaran masunod sa kontraisurhensya sang Estados Unidos, ang ini nga mga asset militar nagatinguha nga magpakuno-kuno nga sibilyan, pero sa matuod, may ara sila sang ispesipiko nga tuyo militar, nga natuga sa ila bilang lehitimo nga target sa inaway. Ginatinguhaan man nila nga sudlon ang mga lokal nga asosasyon sang mga mangunguma para ipalikaw sila sa mga mas militante nga porma sang paghimakas agraryo kag para i-apisar ang ila mga makatarunganon nga demanda.

Kaladlawan kung paano gina-itsapwera sang AFP ang ining mga asset, nga ginapanginwala nila bilang hambalon nga para lang imbestigahan sang pulis kag “simple lang nga problema sang pagpatuman sa laye.” Matapos usaron sang AFP para sa ila taktikal nga mga tinutuyo, ang mga assets daw yab-ok na lang para sa ila. Nagaserbi man ini nga paandam sa nagapanumdom nga mangin asset: pamensaron sang maayo, kay talikdan ka lang nila kung wala ka na balor para sa ila.

Ang kahambog sang AFP ginapagamay ang mga ginpataw nga rebolusyonaryong hustisya bilang desperado nga mga tikang sang tagumatayon nga kahubalagan. Wala saysay nga mga pagpatay, siling nila, sang mga ‘remnants’ sang NPA. Pero ang ila ginalikawan nga batunon ang kamatuoran nga ang rebolusyonaryong kahublagan, nga ginapamunuan sang Partido Komunista ng Pilipinas, yara sa balud sang pagbangon samtang ginapadayon ang komprehensibo nga paghanas sa pulitika, ideolohiya, kag militar sa mga Pulang hangaway kag mga kadre sini.

Lapaw pa sa pagpataw sang hustisya, ang mga Pulang hangaway padayon man sa paglunsar sang mga madinalag-on nga mga taktikal nga opensiba kag punitibong aksyon nga nagaserbi bilang mga serye sang hambalos sa agalon-komprador nga nagahari nga sahi kag ila mga ahente.

Kung may yara man sang grupo nga kinahanglan imbestigahan, amo ina ang AFP nga nagapadayon sa pagbayolar sang internasyunal nga makitawhanon nga laye. Sila ang nagapangharas kag nagapangtortyur sang mga mangunguma, mapintas nga nagapatay sa mga hors de combat nga mga hangaway, naga-strafing kag nagapangbomba sa mga komunidad, kag iban pa nga mga makangilil-ad nga mga gawi.

Samtang ang ugat sang armado nga paghimakas — ang imperyalismo, pyudalismo, kag burukrata kapitalismo– nagapabilin, ang pungsudnon demokratikong rebolusyon magapadayon nga magabante pasulong kag padulong sa mas mataas nga halintang. Bisan pa sa mga kabutigan nga ginapalapnag sang reaksyunaryo nga gobyerno kag sang armado nga mga alipures sini, ang pangmalawigon inaway banwa nga ginapamunuan sang Partido magapabilin nga makatarunganon nga gyera, nga ginabitbit ang demokratikong interes sang mga mamumugon, mangunguma, pamatan-on, kag iban pa nga mga sektor.