Kalakaran na ng gubyernong ito ang pagpapanukala ng mga hindi pinag-isipang solusyong sa halip na makatulong ay lalo pang nagpapalubha sa mga problema. Krisis sa pandemya? Buhusan ng pondo ang turismo habang namamatay sa gutom ang bayan. Problema sa droga? Patayin ng PNP ang lahat ng makasalubong nito at iluwal ang pinakamasahol na kampanya ng pamamaslang sa kasaysayan ng bansa. Lumalakas ang Komunismo? Sunugin ang mga libro, babuyin ang kasaysayan at gawing bayan ng mga hangal ang mamamayan. Ngayon naman, ang mga inutil sa Kongreso ay may bago na namang hinahapag: upang matugunan umano ang problema sa scam messages, ipasa ang SIM Card Registration Act na dati nang hindi pinirmahan ng nagdaang pangulo. Alam na ng masa ano ang kahahantungan ng kwentong ito – panibagong problemang papasanin na naman ng taumbayan.

Hindi mareresolba ng SIM Card Registration Act ang problema ng scam messaging dahil hindi nito ginagarantiyang wala ng scam. Ang gagawin lamang nito ay tipunin ang lahat ng rekord at pribadong impormasyon ng mga konsyumer sa iisang database. Tiyak nang sa kalagayang napakaatrasado ng teknolohiya sa bansa, lalo lamang magiging bulnerable sa mga atake at pagnanakaw ang naturang nakatipong impormasyon. Sa kasalukuyan, lumilitaw sa mga imbestigasyon na ang impormasyon ng mga nakatanggap ng scam messages ay mula sa mga listahan at datasheet na ginamit sa kasagsagan ng pandemya. Kapag nakapasa ang panukala, pasasalamatan pa ng scammers ang gubyernong ito sa pagpapadali ng kanilang buhay dahil nakatipon na sa iisang database ang lahat ng datos na maaari nilang nakawin.

Ang totoo, nagsisilbi ang panukala sa adyenda ng pagpapahigpit ng pagmamanman ng estado sa mamamayan. Lalabagin nito ang karapatan sa pribasiya ng hindi bababa sa 82 milyong Pilipinong gumagamit ng cellphone at 73 milyong Pilipinong gumagamit ng social media. Intensyunal ding malabo ang panukalang batas sa kung anu-anong ahensya ng gubyerno ang may akses sa datos at paano ito gagamitin.

Ang mga batas na tulad nitong sadyang lumalabag sa karapatan ng mamamayan ay dobleng mapanganib sa kamay ng isang ilehitimong rehimeng ang dalawang pinakamataas na pinuno ay parehas anak ng mga sagadsaring pasista. Pahihigpitin nito ang pagkakasakal ng takot na nagpapatahimik sa mamamayan, naglilimita ng kanilang pagkilos at nagbabawal sa kanilang tamasahin ang kanilang marapat sana’y mga protektadong karapatan.

Hinihikayat ng NDF-Bikol ang mga Bikolano na ipanawagan sa kanilang mga lokal na kinatawan sa Kongreso ang pagbawi ng suporta sa naturang panukala. Ngayong rinaratsada na ito ng Kongreso, napapanahong tumindig at ipagtanggol ang karapatan ng mga mamamayan at ang pinakabatayang mga prinsipsyo ng demokrasya.