Gin-ambush sa isa ka yunit sang RJPC-NPA si Joemarie Nabises, sa Sityo Mahusay, Barangay Cambayobo, Calatrava, Negros Occidental kagaina alas 7:00 sang aga.

Si Nabises may kaso nga espionage. Siya ang responsable sa reyd sa isa ka yunit sang NPA sa Sityo Makatagak, Barangay Cambayobo sadtong 2010 kon sa diin namartir si Ka Jessie/Edong/Burgos. Siya man ang nagtudlo sa nahimutangan ni Felix Susas kag kaupdanan nga kabangdanan sa iligal nga pag-aresto sa ila. Isa man siya ka aktibo nga intelligence asset.

Narekober sa iya ang isa ka home-made shotgun (de dose), isa ka calibre .357, 18 ka bala sang shotgun, kag siyam ka bala sang calibre .357.

Natigayon ang pagsilot sa tunga sang sustenido operasyon militar sa banwa sang Toboso kag pila ka bahin sang Escalante City.

Sugod Mayo 23 tubtob subong, Hunyo 10, nagpadayon ang lapnagon nga focused military operation sang 79th IB nga naga-atake sa Escalante City, Toboso kag Calatrava, Negros Occidental: una nga bugso (Mayo 23 tubtob Mayo 28) sa mga komunidad malapit sa Stop Aguinaldo-Bug-ang haywey nga nagsakop sa mga barangay sang San Isidro, Tabun-ac kag San Jose tanan sa banwa sang Toboso; ikaduha nga bugso (Mayo 29 tubtob Hunyo 9) sa 14 ka mga nabukiran nga barangay sang Calatrava kag Toboso; kag ang ikatulo nga bugso (Hunyo 10) ang nag-pokus sa lima ka barangay kag pila ka bahin sang Escalante City.