Kakailian,

Nabara a kablaaw!

Umuna iti amin, ipadanon mi ti napudno a pannakiladingit kadakayo maipapan iti pannakatay ni Police Lieutenant Kenneth Tad-awan idiay Northern Samar. Uray nakadakdakkel ti nagdumaan ti bangir yo iti bangir mi, nagpapada tayo a siaammo iti ut-ot ti matayan ti maysa a kadua iti pannakilaban.

Usto ti kuna yo a mayat nga ag-reflect kalpasan ti pasamak. Ngem saan a dagiti youth laeng ti rumbeng nga agpanunot gaputa ni Tad-awan ket kadua yo. Ti pannakatay na ket pagsarmingan koma ti bukod yo a pangngeddeng ken prinsipyo. Iti pay laeng umuna, saan met dagiti kabataan ti gapuanan ti pannakatay na. Pimmusay isuna gapu iti pannakipaset na iti gubat iti baet ti dua a puersa: tropa ti reaksyunaryo ken tropa ti rebolusyonaryo. Ti pangngeddeng na a makikuyog iti reaksyunaryo a puersa, ti puersa a tumultulong tapno agtalinaed ti madama a sistema, ket pangngeddeng yo met.

Mabalin a maaddaan ti nadagdagsen a kinapateg ti pannakatay ni Tad-awan nu isu ti mangiduron kadakayo a pagpanunutan ti bangir a pinili yo a pagserbian. Nu malagip yo, dakkel a problema ti nailian a minorya ti panagsalaknib iti daga ken kinabaknang ti ili. Kanayon a dawdawaten kadagiti minorya nga isakripisyo ti ansestral a teritoryo tapno paglak-aman kano ti ad-adu. Ngem makita tayo amin a ti dadakkel a kumpanya laeng ti bumaknang. Rigat nga agtalon ken kinakurang ti dadduma nga opportunities, isu met ti gapu nga adu a kakailian tayo ti sumsumrek iti pulisya wenno Army.

Karkaro pay, mainaynayon kayo iti puersa nga agsalsalaknib iti dadakkel a manangidadael a kumpanya, laban iti mismo yo nga ili. Tapno gaburan ti kinapudno nga usaren yo ti training yo iti bukod nga ayan yo, ti isursuro kadagiti pulis ket NPA ti kalaban. Ngem rimmusing ti Nalabaga a hukbo kas reaksyon iti nainhistoriaan a kinaranggas a mapadpadas ti umili. Tiempo pay laeng ti mannakup nga Espanyol, idi gandat da a minasen dagiti balitok ti Kordilyera, insayangkat dan ti nagdumaduma a panagraut tapno isuda ti aglak-am iti kinabaknang ti ili. Awan pay laeng ti NPA idi ngem natured ti panagsalaknib ti kakailian tayo. Ita, adda latta ti mangraraut ngem ti agsalaknib kaniada ket aggapgapu iti mismo pay nga ili.

Iti bangir na, tuloy latta ti panagdepensa ti kakailian tayo ken addaan ti NPA a pangisilpoan ti laban ti minorya iti dakdakkel a laban ti umili a Pilipino. Ti padpadasen ti Kordilyera a pananggundaway, kinakurapay ken ranggas ket mapaspasamak iti intero a pagilian. Saan a kamali a salakniban ti ili ken saan a kamali a makikaykaysa iti dadduma a tao a kapada tayo ti kapadasan.

Apay nga awisen yo ti kabataan a saan nga awaten ti NPA para iti talna nu sigud metten nga awan ti talna? Bayat nga adda ti rumaraut gapu iti kinaagum, saan a maaddaan ti talna iti Kordilyera. Saan a dishonorable cause nga idaton ti kabataan ti biag ken kinaubbing da para iti kakailian tayo. Ti napatpateg a saludsud ket para kadagidiay saan nga idatdaton ti biag da para iti kastoy a penggep. Apay a pilien yo nga agserbi kadagidiay agparparigat iti umili ti Kordilyera? Para iti CPDF, nainkalintegan ti dangadang nga isaysayangkat ti NPA ken awan sabali nu diket ayat ken pride para iti tunggal ubbing mi a pumili nga agserbi iti umili ken rebolusyon.