Ang pahayag sang AFP sa Negros nga pierde na ang NPA isa ka daku nga kabutigan para hinabunan ang indi na gid mapunggan nga pagbalik baskug sang rebolusyonaryo nga kahublagan sang mga pumuluyo sa isla sang Negros kag sa bilog nga pungsod Pilipinas. Bangud ini sang grabe nga krisis sang malakolonyal kag malapyudal nga sistema kag padayon nga pagkatuta sini sa imperyalistang US kon diin nagaduko lamang sa dikta sang anuman nga kagustuhan sang imperyalistang US ang papet nga administrasyon bisan pa nga nagalapas sa soberanya sang pungsod. Padayon man ang pag-imposar sang kasugtanan kag mga polisiya sa ekonomya kaangay sang neoliberal kag mga idu-ido nga maki-US nga pasistang AFP/PNP sa gusto sini himuon sa pungsod pareho sang mga Balikatan, Salaknib kag Marex (maritime exercise) kag iban pa.

Ang ini nga kahimtangan nagaapekto sa pumuluyong Pilipino pareho sa mga mangunguma, mga mamumugon, mga kabataan, kag mga propesyonal, subongman ang mga saray kag sekta nga amo ang direkta nga nagapas-an sang grabe nga kaimolon kag kapigaduhon, kakulang kag kawad-on sang duta, manubo nga sweldo kag wala sang kasiguruhan sa trabaho, mahal nga presyo sa balaklon, barato nga bili sang ila produkto, kag padayon nga pagsirit sa saka sa presyo sang langis kag iban pa nga mga isyu kag problema nga ginapas-an nila. Samtang ang mga dalagku nga agalon may duta kag mga dalagku nga kumprador burgesya nga ara nagapungko sa estado poder nagawaldas kag nagapakasarap halin sa ila ginkurakot sa kaban sang pumuluyo kag mga proyekto nga ginapasulod sa pungsod nga halin sa ila amo nga imperyalistang US. Dugang pa ang ang todo-larga nga pagsulod sa pungsod kaangay sa bag-o lang nga kasugtanan sa PAX SILICA nga ginpirmahan sang inutil, korap kag papet nga Presidente Ferdinand Marcos Jr nga naga sakop sang indi magkubos sa 1,600 hektaryas sang duta sa Pilipinas para hilimuan sang bala, armas, drone, kag nuclear plant sang Estados Unidos kag mga kaalyado sini nga mga pungsod. Ini ang maghatag sang kadelikadohan sa seguridad sang pumuluyong Plipino kon magrisbak ang ila karibal nga mga imperyalistang pungsod kaangay sang China at Rusya.

Ang ginatinikal sang AFP sa isla sang Negros nga nalutos na ang NPA isa lang ka “papogi points” agud may ipahambog sila sa ila amo nga mga dalagku nga agalon may duta-haciendero, mga dalagku nga komprador burgesya kag burukrata kapitalista nga nagapungko sa poder sang estado kag gobyerno sa isla sang Negros kag sa bilog nga pungsod ilabe na sa imperyalistang-US. Ang ginapadayaw sang AFP, PNP, NTF-Elcac kag iban pa nga mapintas nga makinaryas sang reaksyon nga madamo na sa NPA ang nagkalamatay, ang matuod mga sibilyan kag hors de combat ang halos nabiktima kaangay sa Toboso 19 massacre sadtong nagligad nga April 19 sini nga tuig. Tuyo sang militar ilabe na ni Gibo Teodoro sang DND nga hinabunan ang ila kalapasan kag pasismo nga ginahimo sa mga nagahimakas nga Negrosanon. Handum sang matag-as nga opisyal sang militar hugakumon ang poder paagi sa madasig nga promosyon sa sulod sang ila hanay sa dugang nga pagpangurakot sa dako nga alokasyon sang pundo militar. Ang kamatuoran sa kasaysayan nagasiling, “sa likod sang krisis sang imperyalismo amo ang pasismo.” Gani, pareho lang nga gina-into sang US ang AFP paagi kay Marcos Jr kag Gibo Teodoro sang DND nga lunsay mga tuta kag pasista samtang gina-into nga nagamando sa AFP, PNP kag paramilitar sa pagpamatay sa mga inosenteng sibilyan, aktibista kag iban pa nga nagahimakas nga pumuluyo para sa matuod nga kahilwayan kag demokrasya.

Mapatay man ang rebolusyonaryo apang ang rebolusyon magapadayon. Samtang nagapabilin ang mapiguson kag mahimuslanong sistemang malakolonyal kag malapyudal nga ginaharian sang pyudalismo, burukrata kapitalismo kag imperyalismo, maga-usbong ang militante nga paghimakas sang pumuluyong Pilipino kag magabun-ag sang mga bag-ong dugo nga mga rebolusyonaryo nga hugot nga maga-uyat sang armas kag maga-usoy sa hustong dalan sang armadong paghimakas nga sadto gin-usoy man sang mga isganan nga mga pulang hangaway nga wala nagbuya sa ila mga hinganiban tubtob sa katapusan nga pitik sang ila pulso. Bangud sang wala kahubasan nga suporta sang malapad nga masa sa rebolusyon, ang mga rebolusyonaryong martir magaserbe nga handumanan kag inspirasyon sa mga bag-ong tubo sa pagpadayon sang armadong paghimakas paagi sa pagpasakop sa wala sang kalutusan nga New People’s Army dira sa absoluto nga pagpamuno kag paggiya sang Marxismo-Leninismo-Maoismo nga Communist Party of the Philippines (CPP-MLM).

Ang malala kag wala kasolbaran nga krisis sa monocrop nga industriya sang kalamay sa isla sang Negros nga gindulot sang imperyalismong Estados Unidos kag pagkabangkarote sang malakolonyal kag malapyudal nga kinaiya sa pungsod ang magduso sa nagabalingaso nga kainit sang bug-os nga Negrosanon sa liwat nga magpukaw, mag-organisa kag maghulag dira sa mga organisasyon masa idalum sa National Democratic Front of the Philippines (NDFP) kag magpasakop sa New People’s Army sa ululupod nga pagpalupok sang bulkang sosyal paagi sa pagpa-igting sang inaway banwa sa balayon sang Demokratiko nga Rebolusyon sang Banwa tubtob sa tunay nga kadalag-an nga may kalinong nga nakabase sa hustisya sosyal.