Ang sige-sigw nga operasyon sang 62nd kag 94th IB sa mga bukiron nga bahin sang Central Negros nagahatag sang dugang huol kag perwisyo sa mga pumuluyo. Dugang ini nga nagapa-antus sa miserable na nga kahimtang sang mga mangunguma pareho sa kakulang ukon kawad-on sang duta nga matalauma, manubo nga presyo sa ila mga produkto, wala untat nga pagsaka sang presyo sang langis kag iban pa nga mga isyu nga naga-epekto sa ila sa adlaw-adlaw nila nga pagsinalayo.

Subongman, ang nga kalamidad kaangay sang wala untat nga paglupok sang bulkan Kanlaon, pagtuhaw sang mga peste nga nagahalit sa mga pananom kaangay sang RSSI sa mga katubuhan, kag ang nagalala nga El Niño nga tuga sang climate change.

Labi pa nga nagperwisyo sa mga mangunguma ang operasyon sang mga pasistang militar nga nagatuga sang malala nga tensyon ukon kakulba sa mga mangunguma. Nagakabalaka sila nga kon sila ang magkadto sa ila nga uma masal-an sila nga mga NPA. Masami nagatiner ang militar sa mga lugar nga madamo sang tawo, sa mga kabalayan sang sibilyan kabangdanan nga madisturbo ang mga residente sa erya sang ila mga anti-sosyal nga aktibidad kaangay sang pag-inom kag pagsugal. Nagapalapnag ang pasistang tropa militar sang kakugmat sa pumuluyo sa ila pagpangransak sa mga kabalayan kag pagpanilag (surveillance) sa mga indibidwal nga ila gindudahan nga may angot sa mga pulang hangaway.

Ang ginahimo sang mga pasistang militar isa ka porma sang pagpatuman sang program ni Pres. Bong Bong Marcos Jr nga National Action Program for Unity, Peace and Development (NAP-UPD), isa ka kontra-insurhensya nga kampanya sandig sa dikta sang imperyalistang US sa rehimeng Marcos agud padayon nga magamit ang pungsod Pilipinas para sa interes sang imperyalistang US. Ini nga kampanya man ang nagresulta sa mga paglapas sa tawhanong kinamatarung sang mga pumuluyo sa isla sang Negros.

Sang Hunyo 10 alas 11:00 sang aga, nag-abot ang isa ka kolum sang pasistang 62nd IB kag gilayon nga nagpwesto ini kag nagtiner sa proper sang Sityo Lip-o, sakop sang Barangay Imelda, Guihulngan City, Negros Oriental. Ginahinabunan nila ang militarisasyon sa erya sa ila pakunokuno nga pagbantay sa mga gamit sang DPWH sa erya. Nagatiner sila sa mga kabalayan kag nagapangdisturbo sa mga sibilyan kada gab-i.

Sang Hunyo 16, 2026, nag-abot man ang isa ka kolum sang pasistang militar sang 94th IB sa Barangay Makilignit banwa sang Isabela, Negros Occidental. Nagatiner ini sila sa balay ni Jun-jun Mansalon sa nasambit nga lugar nga wala sang pahanugot sa tagbalay.

Hunyo 16, 2026, nag-abot man ang isa ka kolum sang 94th IB sa Sityo Karanawan, Barangay Amontay banwa sang Binalbagan, Negros Occidental. Gilayon man ini nagtiner sa mga kabalayan sa nasambit nga lugar nga wala sang pahanugot sa natungdan ng tagbalay kag tubtub subong ara pa sila sa nasambit nga lugar.

Dugang diri, ginransak kag ginguba ang pwertahan sang balay ni Emie Dayono, minyo sang Sityo Punong, Barangay, Trinidad, Guihulngan City, Negros Oriental sadtong Hunyo 17, 2026, mga alas 11:00 sang udto sang 4 ka mga katapo sang 62nd IB lakip ang duha ka mga surrenderees nga amo nanday Nano Montesino kag Orlando (Ron-ron) Dela Pena. Sila ang naggiya sa militar sa pagransak sa nasambit nga puluy-an nga nagresulta sang pagkaguba sang ila mga kagamitan sa sulod sang balay.

Miltarisasyon, untaton!
Pasismo sang estado, pamatukan!
NAP-UPD sang rehimeng Marcos Jr, Paslawon!