Sa rehimen sang US-Marcos Jr, ginapatuman ang National Action Plan for Peace and Development (NAP-UPD) nga kontra-insurhensyang kampanya. Sandig sini, nagahimo sang mga desperado nga tikang ang pasistang AFP sa tumong nga mapukan ang CPP-NPA-NDF sa erya nga halin pa sadto indi gid nila malab-ot.

Sa Central Negros, kadungan sang mga operasyon militar sang teroristang 62nd IB sa mga binukid nga bahin sang Central Negros, nagtaas ang kaso sang paglapas sa duna nga kinamatarung sang mga mangunguma, kababainhan, pamatan-on, kag iban pa nga mga pumuluyo nga nagapuyo sa mga komunidad nga sakop sang Larangan Gerilya (LG). Subongman, nagalapas sila sa Comprehensive Agreement on Respect for Human Rights and International Humanitarian Law (CARHRIHL).

Pipila sa ila mga kalapasan ang pagtiner sang mga kabalayan sang pumuluyo nga wala sang pahanugot sa tagbalay. Ginahimo nila nga kampo militar ang mga komunidad sang sibilyan nga nagabutang sang kabuhi sa mga residente sa kadelikaduhan.

Sang petsa 26 sa Hunyo, nag abot ang 1 ka kolum sang pasistang 62nd IB sa Sityo Matandugo, Barangay Sandayao, sakop sang Guihulngan City, Negros Oriental. Ara sila nagatiner sa proper sang Sityo Matandugo kon diin nagapanilag sila sa mga kabalayan sa dis-oras sang kagab-ihon. Ginainterogar man nila ang mga pumuluyo angot sa mga NPA.

Sa amo gihapon nga petsa, nag-qbot man ang 1 ka kolum sang 62nd IB sa Sityo Tulo-Tulo, Barangay Trinidad, sa amo gihapon nga syudad. Lain man nga kolum ang nagapalapnag sang terorismo sa Sityo Tuko Dako kag Sityo Kambahugon, Barangay Trinidad.

Petsa Hunyo 29, ginsulahug sang 1 ka kolum ang Sityo Laos, Barangay Binobohan, Guihulngan City.

Petsa 30 sang Hunyo, mga alas 2:00 sang kaagahon, nagkadto ang 1 ka kolum sa Sityo Kambairan, Barangay Trinidad. Nagdiretso ini sa plaza sang Kambairan Elementary School.

Petsa 27 sang Hunyo, may 1 man ka kolumn nag-abot sa Sityo Malatanglad, Barangay Budlasan, Canlaon City Negros Oriental. Lain nga tapok man sa Sityo Kansayawan kag Sityo Duyan-Duyanan, Barangay Linantuyan, Guihulngan City, Negros Oriental. Ginkadtuan sang 4 ka mga katapo sang 62nd IB sa iya balay si Agustin Elinturio, balo kag residente sang Sityo Alamag, Barangay Linantuyan. Ginpaidalum siya sa imbestigasyon kag ginpahug sang mga uhaw sa dugo nga tropa sang 62nd IB.

Samtang sa Sityo Agogolo, Barangay Macagahay, Moises Padilla, Negros Occidental, nag-abot ang isa ka tapok sadtong Hunyo 30.

Nagapanawagan ang LPC-NPA sa mga pumuluyo nga manindugan kag ipakigbato ang ila kinamatarung. Kinahanglan nga pamatukan ang militarisasyon sa kaumahan bangud ini ang nagaguba sang pangabuhian sa pumuluyo.