Sa wala pa mahitabo ang maong panagsangka, nagpahigayon og aksyong pagsilot ang usa ka tim sa NPA sa usa ka pinaka-aktibong sinuholang ahente sa militar nga si Ruel Cuizon didto sa Purok 7 Annex, Barangay San Vicente, Trinidad niadtong Hunyo 26. Dili inosenteng sibilyan si Cuizon. Gisilotan siya tungod sa iyang aktibong papel sa pangmilitar nga gimbuhatong paniktik batok sa rebolusyonaryong kalihukan sa lugar ug sa kasikbit nga mga lungsod ug nakahimo og dakong kadaut ug babag sa rebolusyonaryong organisasyon. Usa siya ka lehitimong target sa aksyong militar nga gilunsad sa NPA sumala sa gitakda sa balaod sa gubat.

Human sa maong aksyon, atol sa ilang pag-withdraw, gikasugat sa operatiba sa NPA ang tropa sa 47th IBPA nga nag-operasyon sa utlanan sa Barangay Banlasan ug Kauswagan sa maong lungsod. Gi-hold ang motor ug gidakop nila si Joel “Ka. Boboy” Soria, samtang nakaikyas ang iyang kauban. Gipangita sa militar ang kauban ni Soria, gipangtarget ang mga balay nga gituohan nilang adto modangop. Niining gabiihona, gireyd sa militar ang balay ni Violeta Nuera sa Purok 7 Annex, San Vicente sa maong lungsod. Walay tagbalay niining panahona diin didto nagpasilong ang nakaikyas nga kauban tungod kay nagsingabot ang ulan.

Sa maong panagsangka, nagresulta sa duha (2) ang patay sa sakop sa 47th IB ug usa ang nasamdan. Samtang luwas nga nakapalayo ang pwersa sa NPA. Nakaangkon man og menor nga samad, apan giatiman na sa medikal sa yunit sa Hukbo ug luwas na ang iyang kondisyon. Sa kasuko sa militar, gipatay nila si Joel “Ka. Boboy” Soria.

Hugtanong nagkundena ang National Democratic Front-Bohol sa pagpatay sa militar kang Ka. Boboy. Usa na usab nga kalapasan sa 47th IB sa CARHRIHL ang ilang pagpatay sa ilang dinakpan.

Dako ang kadaut sa gihimong pagransak sa militar sa balay ni Nuera. Grabeng pagkaguba sa iyang balay, nasamdan ang iyang binuhing kabaw ug nangamatay ang iyang mga manok. Pagka-ugma ug sa mosunod pa nga mga adlaw, grabeng pagpanghasi ang gihimo sa militar ngadto sa mga sibilyan. Ilang gipangutingkay ang kapin kun kulang sa napulo (10) ka mga kabalayan sa maong barangay nga walay search warrant dala sa pagpanghadlok sa rason nga gipangita nila ang samaron sa NPA. Grabeng trauma ang gibati sa mga hingtungdan ilabina ang mga tigulang ug kabataan.

Kinahanglang manubag ang militar sa ilang mga nahimong grabeng pagpangabuso ug pagpangyatak sa tawhanong katungod ngadto sa katawhan.###