Ginkukundenar han National Democratic Front-Eastern Visayas an natikagrabe nga militarisasyon ngan pasista nga terorismo han estado ha rehiyon ha pangunguna han 8th Infantry Division tikang han mag-abre an 2026. An panlasurbo han mga pasista nga tropa, labina ha San Jorge, nagresulta ha pagkamatay han diri mamenos ha usa nga sibilyan, wala-tuo nga pagpapasurender ngan destroso ha pakabuhi han mga parag-uma.

Ha Western Samar, ginpapangunahan han Task Force Gabay han 801st Infantry Brigade-Philippine Army an panringgal ha bungto han San Jorge. Gindeploy dinhi an mga yunit han 3rd Infantry Battalion at 14th IB (nga ginbalhin tikang ha Leyte yana nga tuig) agud maghimo hin mga operasyon kombat ngan saywar ha mga komunidad.

Pokus han grabe nga presensya an baryo han Cagtoto-og diin nahireport an armado nga agway han Bagong Hukbong Bayan kontra ha 3rd IB hadton Pebrero 2. Ginreport han mga residente ngausa nga parag-uma nga sibilyan nga gin-ngangaranan nga “Jaime” an namatay tungod ha pagpapabuto han mga pasista nga sundalo.

Nahireport liwat an armado nga agway giutan han BHB ngan 14th IB ha Barangay Mobo-ob hadton Pebrero 16. Ha masunod nga adlaw gindeploy ha bungto an diri mamenos ha duha nga howitzer. Nahisumat liwat an operasyon kombat han Bravo Company han 46th IB ha Barangay Sto. Niño, Paranas, Samar.

Ha butnga hini dirudilain nga saywar an ginhihimo han mga pasista nga tropa ha mga parag-uma. Kahuman makapatay han inosente nga sibilyan, ginpantagan han 3rd IB hin bugas ngan delata an mga residente han Cagtoto-og, ha desperasyon nga pakalmahon hira kasunod han kamadarahug ngan destroso ha pakabuhi nga gindudurot han mga pasista. Diri hira makatukad tungod ha mga “lockdown” ngan palisiya han militar nga istrapingon an hin-o man nga makahitapo ha operasyon nga waray magpakilala ha ira.

Paluyo-luyo liwat an mga seremonya han pagpapasurender ngan pagsalawad han “aplikasyon para ha amnestiya” bisan ha Northern Samar, Eastern Samar ngan Leyte. Kaupod hini an mga ordinaryo nga parag-uma nga pira katuig na nga biktima han pan-gigipit, o diri ngani mga traydor nga maiha na nga gintalikuran an masa ngan rebolusyon. Ha kamatuoran nag-uunahay an magkalain-lain nga pasista nga yunit han militar ngan pulis nga magparayaw han mga “nakab-ot” ngan mahakin an kwarta ilarum han E-CLIP.

Nananawagan an NDF-EV ha katawhan han Eastern Visayas nga magkaurusa, ibuksas ngan atuhan an pasista nga terorismo han rehimen US-Marcos. Makakab-ot la nira an ira mga katungod ngan mapapagbayad hin mahal an mga pasista nga berdugo pinaagi han duruyog nga paghasog ha dalan han rebolusyunaryo nga pag-ato. Kinahanglan makig-usa ha ira an mga grupo ha tawhanon nga katungod ngan mga nahigugma ha tinuod nga kamurayawan, agud ipanawagan an hustisya para ha mga biktima han pasismo han estado.