Kadagiti nabatbati a bulan iti termino na agbalbalin a desperado ti rehimen a US-Duterte iti panangipilit ti diktadura na iti intero a pagilian. Tapno ipatungpal ti kontra-insurhensya a gubat, papa-iruten na ti tengngel kadagiti nasulinek a barangay ti Cordillera babaen iti panangusar kadagiti pasista nga armado a puersa na. Maisupadi iti ipanpannakkel da a ‘magungun-od da ti puso ken rikna ti umili,’ maus-usar ti puersa’t militar tapno puersaen ti umili nga agtungpal iti mandar ken pagayatan da. Manipud idi Hulyo 2021, addan dagiti ulat ti Retooled Community Support Operations a nagkampo iti nasurok 47 a barangay iti Cordillera. Iti probinsya ti Abra: 2 a barangay iti Tubo, 9 a barangay iti Malibcong ken 1 a barangay ti Lacub. Iti Kalinga: 11 a barangay iti Balbalan, 4 a barangay iti Lubuagan, 1 a barangay iti Tabuk City, 7 a barangay iti Pinukpuk, 3 a barangay iti Pasil, ken 1 a barangay iti Rizal. Iti Mntn. Province: 3 a baryo iti Besao, 5 a baryo iti Sagada, 2 a baryo iti Bontoc, ken 3 a baryo iti Bauko. Ti panangipatungpal ti Barangay Development Program ken dagiti proyekto ti NTF-ELCAC ti maus-usar kas rason iti panagserrek dagitoy a tropa ti RCSP. Malaksid pay ditoy, awan-sarday a maipatpatungpal dagiti operasyon nga panagtiktik ken kombat iti nadumaduma a baryo iti intero a rehiyon.

Kadagitoy a baryo no sadino a maipatpatungpal dagiti operasyon a kombat, panagtiktik ken RCSP, napasaran ti umili ti adu a panaglabsing iti karbengan-tao ken nasaknap a pannakariribuk iti inaldaw a biag da gapu kadagitoy a pasista a tropa. Kabayatan nga ikagkagumaan da a mailasat ti inaldaw a biag da iti tengnga ti pandemya, ti presensya ken pananglipit dagiti tropa ti militar ket nayon a mangpadagsen iti kasasaad da. Kadagiti barangay nga inokupar da irusrussuat dagiti puersa militar dagiti panagsensus iti linged ti National ID System. Al-alaen da ti nagan dagiti residente, pagnaedan, numero ti cellphone, ID, relasyon kadagiti nalatak a personahe ti BHB, ken dagiti organisasyon a timmiponan da. Dagiti impormasyon a naurnong da kadagitoy a sensus ti us-usaren da tapno puersaen dagiti sibilyan nga umatendar kadagiti manangallilaw nga aktibidad a mangiparang kadakuada kas ‘NPA surrenderees.’ Maharas dagiti residente ken mapabpabasol a ‘suporter ti NPA.’ Kadagiti dadduma a baryo ti Lacub, Abra, dinadael dagiti soldado ti 24th IB dagiti kalapaw ken puersado nga ininteroga dagiti residente iti panawen a nagoperasyon da idi naudi a lawas ti Hulyo inggana iti umuna a lawas ti Agosto. Adda met laeng dagiti residente a pinuersa da nga aggayd. Maysa a mannalon ti iligal a rinikisa ken puersado nga impan iti baraks ti 24th IB iti Sitio Barbarit, Bgy. Tagodtod, Lagangilang, Abra. Adda dagiti agamang iti Malibcong ken Lacub a puersado a linuktan dagiti tropa ti 24th IB kadagiti iligal a panagrikisa da. Dinillaw dagiti residente iti dadduma a baryo ti Mountain Province ti makatawen a presensya dagiti soldado kadagiti barangay da gapu kadagiti restriksyon nga inyulog da, a manglimitar kadagiti ekonomiko nga aktibidad da kas iti panagtalon, panaganup ken panagkalap. Adu a lokal nga opisyal iti tukad ti probinsya, munisipyo ken barangay ken panglakayen iti intero a rehiyon ti napuersa nga agpirma kadagiti insagana ti DILG a deklarasyon ti ‘persona non grata’ kontra iti BHB ken dagiti na-red tag a lehitimo nga organisasyon ti umili.

Bayat a nakaro a matangngel dagiti aktibidad ti umili, dagiti armado a puersa ti rehimen ket nawaya nga agsawsawar kadagiti barangay a kasla nailaksid da iti pandemya. Ti ilaslastog da a “nabakunaan kami met” ket saan na a kayat a saoen a saan da a mangiwaras ti virus. Nalawag a dagiti lockdown ken restriksyon gapu iti pandemya ket maus-usar tapno iduron ti implementasyon dagiti makadadael ken kontra-umili a proyekto ti rehimen ken dagiti amo na nga imperyalista. Maibilang kadagiti proyekto ti rehimen a salsalakniban dagitoy a tropa ket ti serye ti Gened Dam iti Apayao River iti Kabugao ken Calanasan, Nabuangan Dam iti Conner, a pareho a masarakan iti probinsya ti Apayao; Kalinga Geothermal Project iti Pasil, Kalinga; Upper Tabuk Hydroelectric Project iti Upper Tabuk, Kalinga; dagiti proyekto ti ekoturismo kas iti Suknan Waterfalls project iti Pinukpuk, Kalinga, ken dadduma pay.

Ti diktar ti imperyalista a pamuspusan a ‘whole-of-government’ a tinulad ti rehimen kas ‘whole-of-nation approach’ iti gubat a kontra-insurhensya na, ket napaneknekanen a pirmi a napaay iti Afghanistan. Kasapulan a papigsaen tayo ti intar ken pairtengen ti gubat ti umili tapno marebbek ti narugit a gubat ti rehimen. Agpanpanawagan ti Cordillera People’s Democratic Front iti umili ti Cordillera a labanan ken paayen tayo ti ‘whole-of-nation approach’. Masapul nga ipangato ti tukad ti panagkaykaysa ken aktibo a makidangadang kontra iti presensya dagiti tropa ti RCSP kadagiti barangay tayo. Gapu kadagiti limitasyon nga ited ti pandemya, ikagumaan tayo nga irussuat ti nadumaduma a managparnuay a porma ti dangadang tapno labanan dagiti manangallilaw ken mananggudua a taktika dagitoy a tropa. Kangrunaan iti amin, masapul nga iyabante tayo ti gubat ti umili iti amin a tay-ak kas depensa laban iti daytoy a kontra-umili a kampanya nga irusrussuat ti daytoy a terorista a rehimen.