Download: PDF

Sangoen dagiti umili ti Pilipinas dagiti pangta iti nailian a soberanya ken seguridad iti baet ti agtultuloy a panaglapped ti baybay idiay West Philippine Sea ken ti dumakdakes ken narungsot nga addang ti China. Ngem ti dakdakkel a pangta iti wayawaya ken kinatalged ti pagilian ket no ipalubos ti rehimen a Marcos nga usaren ti gobyerno ken militar ti US ti Pilipinas kas sentro ti pagtaodan ken panagsagana iti gerra maibusor iti imperyalista a karibal na a China.

Tapno masalakniban ti panagwaywayas ken kinatalged da, masapol a labanan dagiti umili a Pilipino ti agtultuloy a panagado dagiti ganggannaet a tropa iti panangidaulo ti US idiay West Philippine Sea ken South China Sea, ken ti umad-ado a kaadda dagiti tropa ken armas ti US kadagiti base militar iti Pilipinas, bayat nga awisen da ti China nga agpasakop iti pangngeddeng ti International Arbitral Tribunal idi 2016, ken irupir ti natalna a resolusyon kadagiti risiris babaen ti dayalogo. Masapol a labanan da ti umad-ado nga anti-Chinese a retoriko iti publiko a diskurso a mangiturong iti Sinophobia, ken ti panangisungsong ti gerra ti US, a mamagbalin nga imposible ken narigat ti ania man a natalana a solusyon kadagiti risiris.

Ipampanawagan ti Partido a laksiden ti militarista a kapanunotan nga itantandudo ti imperyalista nga US, kasta met ti rehimen a Marcos ken dagiti buyot na, ken dagiti paspasurot a maka-US, a dagiti riri idiay West Philippine Sea ket masolbar laeng, wenno kangrunaan, babaen ti puersa militar. Parparuaren da a kakaasi ti umili a Pilipino no awan proteksyon ti US–naan-anay a mangkillo wenno mangpunas iti pakasaritaan ti panangsakop ken agtultuloy a panagturay ti US iti Pilipinas tapno pagbalinen daytoy a nakasanggir iti US iti ekonomya, pulitika ken militar.

Rumbeng nga addaan tayo ti nauneg a pannakaawat iti pakasaritaan ken nadumaduma nga aspeto a mangbukel kadagiti agdama a parikot tapno maaddaan tayo iti nalawag a panangtannawag iti dalan ti pannakidangadang tapno masalakniban ti wayawaya ti pagilian iti tengnga ti umir-irteng nga inter-imperyalista a panagririsiris.

1. Ti kumarkaro a risiris iti nagbaetan ti Pilipinas ken China ket nainaig iti panangpasinged ti US iti militar na idiay Asia-Pacific iti napalabas a tawtawen, a maitunos iti heyopolitiko nga imperyalista nga estratehiya a manglapped iti idadakkel ti China iti ekonomya ken militar a pannakabalin. Dagiti kontradiksyon iti komersyo, ekonomya ken diplomasya ket agtultuloy a tumadtadem iti nagbaetan ti US ken China, agpadpada nga imperyalista a pannakabalin, iti sangoanan ti sangalubongan a krisis iti ekonomya, ken ti tarigagay ti imperyalista nga US a mangitantan ti dumakdakkel a pannakabalin ti China iti sangalubongan, tapno mapalawa ken bagien dagiti lugar ti impluwensya ken pagpuonan na.
Idi 2011, indeklara ti gobyerno ti US ti “pivot to Asia” nga estratehiya na tapno maiyalis ti kangrunaan a pannakaipamaysa dagiti ganggannaet a tropa manipod idiay Afghanistan iti makunkuna nga “Indo-Pacific” a rehiyon (manipod India agingga idiay Australia). Sipod idin, ti US ket nangpabileg ti presensya na iti daya ken abagatan a kosta ti China, iti makunkuna a first-island chain manipod idiay Kuril Islands idiay amianan a pungto ti Japan, aginggana idiay Korean peninsula, Taiwan, idiay Pilipinas ken Borneo, nupay daytoy ket nasinga idi saan a dagos a nakapanaw idiay Afghanistan aginggana idi 2021.

Ti konsepto ti first-island chain ti US ket maysa a napateg nga elemento iti makunkuna nga Indo-Pacific strategy. Sigun kadagiti mismo nga opisyal ti US, ti panangibulos ti US kadagiti puersa militar, nangruna ti panangsuporta iti “wayawaya” ti Taiwan, ket nairanta a mangpilit wenno mangallukoy iti China nga “umuna a pumaltog”. Plano ti US a pabilgen ti presensya na kadagiti base militar idiay Japan, ken agpalpallailang itan a mangpalawa kadagiti base militar na idiay Korea. Idi 2014, pinartuat ti US ti Enhanced Defense Cooperation Agreement (EDCA) iti Pilipinas tapno mapalubosan daytoy a mangibangon kadagiti base ken pasilidad ti militar iti uneg dagiti kampo ti Armed Forces of the Philippines (AFP).

Paset ti “pivot to Asia” nga estratehiya ti US ti panangpadakkel ti ayuda a militar iti Pilipinas babaen kadagiti programa ti US a kas ti Foreign Military Financing, Foreign Military Sales, Excess Defense Articles ken Foreign Assisstance Act. Nangnangruna, nangipaay ti US iti pondo para iti pannakaiyalis dagiti bapor iti Pilipinas tapno mapabileg ti “interoperability” (panagkaykaysa ti operasyon) ti Pilipinas kadagiti nabal a bapor nga ipuesto ti US iti rehiyon. Manipod idi 2011, ti US ket nangiyalis iti di kumurang nga innem a lugan a nabal na iti Pilipinas, a mairaman ti BRP Gregorio del Pilar, ti BRP Ramon Alcaraz, ken ti BRP Andres Bonifacio. Sumagmamano pay ti naikeddeng nga iyakar iti sumuno a tawtawen.

Kas iti ado a dadduma pay a paset ti lubong, determinado ti US a mangirugi ti armado a panagderraaw idiay Asia-Pacific tapno bussugen ti pannakaigamer na iti gubat, mapalawa ti hegemonya na, mapabileg ti turay na iti ekonomya, ken ep-epan ti pannakawaw na iti ganansya ti industriya iti armas. Tapno maiparbeng ti panggep da a mangpabileg iti militar a presensya da iti rehiyon, rubrubruban ti imperyalista nga US ken dagiti kaalyado na dagiti riri iti nagbaetan ti Pilipinas ken China.
Dagiti nabiit pay a Balikatan war exercises ti nangpakaro iti tensyon a militar idiay South China Sea. Ti US ti nangidaulo kadagiti puersa a nabal manipod idiay France, Australia, Japan ken Pilipinas tapno agisayangkat iti makunkuna a “joint maritime patrol” idiay South China Sea, a naikuna a paset ti operasyon a ” freedom of navigation”, ngem addaan deklarado a militarista a panggep a “manglapped” iti China. Agtalinaed pay dagitoy a nabal a puersa para iti sabali pay a makunkuna a war exercise. Manipod iti igid ti baybay ti Palawan ken Ilocos Norte, nagisayangkat ti US ti live fire exercises babaen kadagiti HIMARS na tapno agpabittak kadagiti rocket iti baybay nga agturong idiay China, ken pimmuntirya iti maysa a bapor nga “aramid-idiay-China” a kunkuna da a mangirepresentar iti maysa a “pammarang a kabusor”.

2. Nagtultuloy iti napalabas a dekada dagiti riri a nainaig iti teritoryal a baybay iti nagbaetan ti Pilipinas ken China, a gapoanan ti panangitultuloy ti China a mangsuppiat iti panangpilit ti militar ti US. Maitunos iti plano ti seguridad ti China a mangpalawa ken mangpasingked iti estratehiko a lugar na, maulit-ulit a sinalungasing na dagiti kalintegan ti PIlipinas iti soberanya ken ekonomya, ken nagturong iti ad-adda pay nga antagonismo.

Idi 2012, bayat ti Balikatan exercises, imbaon ti militar ti Pilipinas ti BRP Gregorio del Pilar idiay Scarborough Shoal tapno lapdan ti maysa a Chinese a bapor nga agkalap sadiay. Daytoy ti nangiturong iti dua a bulan a rinnikkiar kalpasan a nangikabil ti China iti di kumurang a dua a bapor a pang-sarbeylans iti lugar tapno malapdan ti militar ti Pilipinas. Iti sidong ti “gentleman’s agreement” wenno “tungtungan lalaki” a pinatalgedan ti US, impanaw ti Pilipinas dagiti bapor na iti lugar, a saan a sinurot ti China. Sipod idin, tinaginayon ti China ti presensya iti dayta a lugar, a nangparigat kadagiti Pilipino a mangngalap a mapan sadiay.

Idi 2013, dandani makatawen kalpasan ti panangideklara ti US iti “pivot to Asia”, rinugian ti China ti agibangon kadagiti pasilidad ti militar idiay Spratly Islands. Tapno maiparbeng dagiti tignay na, inlanad ti China ti mapa a “nine-dash line” a naan-anay a nangtagikua iti sibubukel a South China Sea agraman dagiti paset ti baybay a sakop ti Pilipinas, kasta met ti Vietnam, Malaysia, Brunei ken Indonesia. Iti simmaruno a sumagmamano a tawen, nangbangon ti China iti pito a pasilidad kadagiti “maritime feature” idiay Spratly Islands, a paset ti exclusive economic zone ti Pilipinas.

Idi 2016, nangngeddeng ti International Arbitral Tribunal a pabor iti Pilipinas iti kaso nga impaulog na idi 2013 a nangkarit iti nine-dash line ti China. Imbasura ti IAT ti tagtagikuaen a teritoryo ti China idiay South China Sea, ken dinakamat ti sakop a teritoryo ti baybay, exclusive economic zone ken extended continental shelf ti Pilipinas. Kanayonan na, impakaammo na a ti tallo a pasilidad nga impatakder ti China idiay Fiery Cross Reef, Subi Reef ken Mischief Reef, ket adda iti uneg ti exclusive economic zone ti Pilipinas. Inlawlawag na a ti Scarborough Shoal ket saan a paset ti exclusive economic zone ti ania man a pagilian, ken indeklara dayta kas maysa a komun a pagkalapan a masapol a raemen dagiti mangngalap a Pilipino, kasta met dagiti Chinese.

Ti China ket nagturong iti panangbutbuteng ken panangbusor iti Pilipinas idiay South China Sea, nga inusar na ti nagado a lugan a pangbaybay tapno agisayangkat kadagiti taktika ti panangriribok, dagiti maniobra a panaglapped, panangiparit kadagiti lugar pagkalapan, panagbomba ti danum kadagiti bapor ti Pilipinas, dakkel a panagkalap a mangsamsam iti kinabaknang ti taaw, ken panangdadael kadagiti rekurso ti baybay ti Pilipinas.
Idi napan a tawen, pinairteng ti China ti kinaranggas na idi namindua a binomba ti danum dagiti bapor ti Philippine Coast Guard a mangipaay kadagiti suplay iti BRP Sierra Madre ti Pilipinas a nakadisso idiay Ayungin Shoal. Impapilit ti gobyerno ti China a dagiti operasyon ti resupply idiay Ayungin Shoal ket aglabsing iti nalimed a “gentleman’s agreement” a pinirmaan idi ti rehimen ni Duterte, a nakaibatayan ti saan a panangitulod kadagiti materyales a pangtarimaan iti nakadisso a bapor ditoy. Impasingked pay ti China a dagiti kasta nga operasyon ket aglabsing iti maysa a “baro a modelo” a katulagan iti kumander ti Western Command ti AFP, a kunkuna da nga adda pammalubos dagiti opisyal ni Marcos.

Lalo a pinakaro ti China ti panangbusor idi binomba na ti danum dagiti bapor ti Pilipinas a nagpatrolya idiay Scarborough Shoal, ken nagipangta a mangaresto, mangrugi iti Hunyo 15, kadagiti ganggannaet a “makibiang” iti kadanuman nga awan basaran na a tagtagikuaen.

3. Ti kumarkaro a panangbusor ti China iti Pilipinas ket maysa a panagbalbaliw iti atiddog a pakasaritaan ti sosyo-ekonomiko, kultural ken diplomatiko a relasyon, ken ti natalna a panagbiag ti dua a pagilian, no sadino a ti teritoryo a taaw ken lugar pagkalapan ket agpada a nabayag a nagnumaran dagiti mangngalap manipod iti dua a pagilian, uray manipod sabali a pagilian. Ad-adda a nagbalin a nakarit ti China iti umili a Pilipino manipod idi nagbalin daytoy nga imperyalista a pannakabalin sipod iti naladaw a paset ti dekada 2000.
Ti di panagkikinnaawatan iti nagbaetan ti China ken umili a Pilipino ket dimmakkel iti sidong ti napalabas a turay ni Duterte. Tapno magun-od ti pabor ti China, inyaleng-aleng ni Duterte ti pangngeddeng ti International Arbitral Tribunal idi 2016 ken inkalintegan na ti turay ti China idiay South China Sea, a kasukat dagiti kari a suporta a pampulitika ken dakkel a pondo a mausar kadagiti proyekto ti imprastruktura iti Pilipinas. Naginbubulsek ni Duterte iti panagkedked ti China a mangikkat iti dakkel a presensya na idiay Scarborough Shoal, iti laksid ti kari a saan a manglapped kadagiti Pilipino nga agkalap iti lugar. Bayat a nagbalin a paspasurot ni Duterte iti China, intultuloy ti gobyerno ti US a pinabileg ti relasyon na iti AFP a nangted iti saan a nababbaba ngem $600 a milyon manipod 2016 agingga iti 2022, ken nangpasinged kadagiti operasyon a nabal iti Pilipinas ken kadagiti kabangibang a baybay.

Immirteng ken limmatak ti panangbusor ti China iti naglabas a tawen iti sango ti panangpairot ti rehimen a Marcos ti pannakikumplot iti plano ti US a mangpalawa ti militar a presensya na iti pagilian, kasukat ti suporta a militar ken pulitikal ti US. Manipod idi 2022, pinalubosan ti rehimen ni Marcos ti US a mangpalawa iti presensya iti uneg ken aglawlaw ti Pilipinas, ken nangiplastar kadagiti alikamen ken tropa ti militar kadagiti naireport a 17 a lugar iti intero a pagilian, a mairaman dagiti siyam nga opisyal a “nagtulagan a lokasyon” iti sidong ti EDCA.

Iti panangisungsong dagiti mammagbaga a militar ti US, nanglukat ti rehimen a Marcos, babaen ti AFP ken Philippine Coast Guard kadagiti “supply mission” idiay Ayungin Shoal a nangitugot kadagiti alikamen para iti konstruksyon ti BRP Sierra Madre, a nalawag a panggep na a surunen ti China, a simmungbat babaen ti pananglapped ken panangbomba ti danum kadagiti bapor ti Pilipinas.

Nabiit pay a simrek ni Marcos iti “trilateral alliance” a kadua ti US ken Japan, a nangbabalaw iti “napeggad ken naranggas a tignay” ti China idiay South China Sea.

Iti laksid ti panangipakaammo na iti panggep na a mangbirok iti “nataltalged a pamay-an” a mangrisot kadagiti parikot iti China, intultuloy ni Marcos ken dagiti opisyales na ti panangisagana kadagiti puersa militar a maibusor iti “pangta manipod iti ruar” a nalawag a mainaig iti China. Intultuloy ni Marcos a pinaregta dagiti lugan a nabal ken pangbaybay ti Pilipinas a mangirugi iti ad-ado pay nga operasyon a mangpakpakaro iti tensyon iti China.

Napaay ni Marcos nga ikkan prayoridad dagiti diplomatiko ken pampulitika a pamay-an, kasta met dagiti ligal nga addang, tapno irupir ti nainkalintegan a panangtagikua ti pagilian idiay West Philippine Sea, a pinatalgedan ti desisyon ti IAT idi 2016. Impaganetget dagiti eksperto iti linteg no kasano a sinayang ti gobyerno ti Pilipinas ti panagballigi na iti IAT idi 2016, nga awan ti panagregget na a mangitandudo iti kalintegan ti pagilian a mangidarom iti China kadagiti maitutop a korte iti sangalubongan.

4. Iti napalabas a sumagmamano a bulan, nakallalagip ti nalimed a kampanya a nangpataod ti al-alla a China tapno maimpluwensyaan ti panunot dagiti Pilipino ken paypayan ti Sinophobia (wenno gura kadagiti Chinese). Ni Commodore Jay Tarriela ti maysa a mangidadaulo iti daytoy, nga iti nabiit ket pimmaset iti panagsanay idiay Washington a pinondoan ti embahada ti US, nga awan sardeng iti panagngiwat kadagiti tirada nga anti-Chinese. Inaldaw nga agliplipyas dagiti damdamag ken komentaryo a mangparnuay iti negatibo a sentimyento ti publiko maibusor iti China. Adda sumagmamano a nasayaat nga indibidwal ken organisasyon ti maisursurot iti ahitasyon ti US para iti gerra.

Karaman iti dayta ti paypaypayan iti midya a “makapadanag a panagado” ti “pinullo a ribo” nga estudyante a Chinese idiay probinsya ti Cagayan (nga adda nangibaga nga amangan nga “espiya”) a nailawlawag dagiti pagadalan ken uray dagiti ahensya ti gobyerno. Dagiti nangato nga opisyal ti AFP ket nabiit pay a nagkuna a ti China ket agrekrekrut iti intar dagiti heneral tapno iwaras ti atap ti panag-espiya. Mismo a ni Marcos ket nangipakaammo iti publiko nga adda dagiti gandat ti “impiltrasyon” dagiti ganggannaet a turay. Ilimlimed da ti kinapudno a dagiti nangato nga opisyal ti AFP ket nabayagen nga umaw-awat ti indoktrinasyon ken panagsanay manipod iti US, ken nabayagen nga agserserbi a mammagbaga ti AFP dagiti opisyal militar ti US.

Tapno maparayray ti anti-China a rikna, maipalpalubos met dagiti iligal ken kriminal nga aktibidad a nainaig iti “Philippine Offshore Gaming Operations” wenno POGO, a pinaregta met ti gobyerno ti Pilipinas. Ti pannakairaman ita ni Tarlac City Mayor Alice Guo iti iligal nga operasyon ti POGO ket maus-usar a mangpataod kadagiti panagatap a maysa isuna a “sleeper agent” wenno pasurot ti China.

Itay nabiit, palpalataken iti midya ti Pilipinas ti pammabasol dagiti opisyal ti gobyerno ti PIlipinas, uray awan direkta nga ebidensya, a ti China ti nangibuntuun ti natay a korales a nasarakan idiay Escoda Shoal, ti kaasitgan a maritime feature idiay Palawan. Dagitoy met laeng nga opisyal militar nga iti nabiit ket kasta unay ti panagsiddaaw iti panagbomba ken panagpabittak ti rocket idiay taaw ti Pilipinas nga insayangkat ti militar ti US iti napalabas a Balikatan war exercises, ngem awan ti nadakamat maipapan iti nakaro a pannakadadael ti aglawlaw, kinabaknang ti taaw ken pagbiagan ti umili.

5. Ti pudno a nailian a wayawaya, kappia ken kinatalged ti tarigagay ti umili a Pilipino iti tengnga ti kumarkaro nga inter-imperyalista a panagririri. Iti kasta, rumbeng da a tubngaren ti imperyalismo nga US iti pananggundaway kadagiti riri iti taaw ti Pilipinas ken China tapno iparangguyod ti Pilipinas iti panagpataod ken panagisagana na ti gerra maibusor iti imperyalista a karibal na a China. Kagiddan na, masapol nga iduron da ti China a raemen dagiti pangngeddeng ti International Arbitral Tribunal idi 2016, ken aktibo a mangitandudo iti dayalogo ken natalna a solusyon dagiti riri iti taaw.

Rumbeng nga ingga’t bael a labanan dagiti umili a Pilipino ti imperyalista a gubat ken ti pannakigubat babaen ti proxy, tubngaren ti pannakibiang militar ken panagpataod ti gerra, irupir ti pannakapapanaw iti amin a puersa a militar ti US iti daga ken teritoryo a baybay ti pagilian, ken labanan ti panagbalin nga aso-aso ti rehimen a Marcos iti estratehiya iti heyopulitikal ti US a manglapped iti natalna a pannakarisot dagiti riri.

Iti partikular, masapol nga irupir ti umili a Pilipino ti pannakarakrak ti amin a base ken pasilidad militar ti US iti Pilipinas, a pakairamanan dagiti opisyal a naideklara iti sidong ti EDCA, agraman dagiti nalimed a pasilidad militar ti US ken ti pannakaikkat ti amin nga armas ti US a naikabil ditoy.

Rumbeng nga aktibo a maiduron ti demilitarisasyon idiay West Philippine Sea, a pakairamanan ti pannakaikkat ti amin a nabal a bapor ti US ken dagiti alyado na, agraman dagiti bapor ken lugan a pangbaybay ti Coast Guard ti China, manipod kadagiti teritoryo a baybay ti Pilipinas, ken ti exclusive economic zone ken ti extended continental shelf daytoy, kasta met ti panangrakrak kadagiti pasilidad militar ti China idiay Spratly Islands.

Masapol nga awisen da ti internasyonal a komunidad a mangsuppiat iti US, France, Australia ken Japan iti maar-aramid a panangpakaro ti tensyon a militar iti rehiyon.

Mainaig kadagiti isyu iti baybay ti China, masapol nga agtignay dagiti umili a Pilipino a mangitandudo ti dayalogo ken natalna a pannakarisot dagiti isyu iti nagbaetan ti Pilipinas ken China kas maibatay iti 2016 a desisyon ti International Arbitral Tribunal. Masapol nga allukoyen da ti panagkaykaysa dagiti kabangibang a pagilian iti aglawlaw ti South China Sea, ken agpatulong da iti United Nations ken dadduma pay nga internasyonal a grupo, tapno maallukoy ti China a mangtungpal kadagiti obligasyon na sigun iti UNCLOS, a pinirmaan ken pakairamanan na.

Mabalin a maipasango kadagiti ganggannaet ken internasyonal a korte iti panangbayad ti China iti gatad ti pannakadadael ti kinabaknang ti taaw a resulta ti inaramid a reklamasyon ti daga, industriya ti panagkalap, pannakaibangon kadagiti pasilidad ti militar idiay Fiery Cross Reef, Subi Reef, ken Mischief Reef.

Rumbeng met nga irupir ti umili a Pilipino iti China nga isardengen ti panagaramat ti agresibo a puersa maibusor kadagiti sibilyan a mangngalap, nangruna dagiti babassit a mangngalap, ipanaw dagiti armado a bapor ken dagiti pang-industriya a lugan a pagkalap idiay Scarborough Shoal, ken raemen ti kalintegan dagiti mangngalap a Pilipino ken dadduma pay a nasyunalidad nga isayangkat ti tradisyonal a panagkalap iti lugar. Rumbeng a tubngaren ti China gapo iti saan a nainkalintegan ken imperyalista a mandar a panangaresto kadagiti mangngalap iti tagtagikuaen na a danum iti sakop ti West Philippine Sea, ken irupir ti dagus a pannakaibasura daytoy.

Rumbeng a tumakder para iti pagimbagan ken natalna a panagkakabsat ti Pilipinas ken China, babalawen ti gobyerno a Marcos iti panangitandudo ti gerra kas instrumento ti nailian a patakaran ken iti pannakapaay na a mangitandudo iti natalna a pannakarisot dagiti riri iti China. Rumbeng met a kiddawen iti China a silalawag nga ideklara nga awan ti intensyon na nga agaramat ti armado a pigsa maibusor iti Pilipinas.

Awisen ti Partido ti umili a Pilipino a mangbukel iti nalawa a nagkaykaysa a prente ken pagkaykaysaen ti amin a patriyotiko nga organisasyon, institusyon ken dagiti indibidwal nga agtarigagay ti pudno a nailian a wayawaya, sumuppiat iti imperyalista a gerra ken gerra a proxy, ken mangitandudo iti natalna a pannakarisot dagiti riri iti nagbaetan dagiti pagilian.

Rumbeng a pairtengen ti umili a Pilipino ti panangbusor iti imperyalista a panagturay ti US iti Pilipinas, pannakibiang militar ken panagpataod ti gerra. Awisen ti Partido ti amin a sektor a mangsuporta iti armado a pannakidangadang ti New People’s Army kontra iti pasista a takiag ti imperyalismo nga US, nga us-usaren ti US iti panangpataod na ti gerra. Ti panangidur-as ti armado a pannakidangadang maibusor iti aso-aso a buyot ti US ket napateg iti panangikagumaan a mangpasardeng iti panagbittak ti inter-imperyalista a gerra.

Rumbeng nga ibangon ti umili a Pilipino ti pannakikabsat iti umili iti intero a lubong, a pakairamanan dagiti umili nga Amerikano ken Chinese, tapno maitandudo ti agpapada a tarigagay para iti kappia ken panagpatingga dagiti inter-imperyalista a gerra wenno dagiti gerra a pinarnuay ti imperyalismo. Rumbeng nga agkaykaysa da nga iduron ti US nga isardeng ti panangrubrob ken panangpabayag kadagiti gerra kas idiay Ukraine, Gaza ken dadduma pay a paset ti lubong, a mangikabkabil iti peggad kadagiti biag, wayawaya ken kinatalged ti amin nga umili.